Pas 30 vitesh një femër shpallet “Sportistja e Vitit”

Brenda dhe jashtë fushës, 2015-ta duket se ishte viti i Serena Williams. Revista “Sports Illustrated” e nderoi superstaren e tenisit si “Sportisten e Vitit 2015”. E veshur me të zeza, vështrim provokuese dhe e ulur mbi fron, kështu shfaqet Serena Williams në kopertinën e revistës.

Ishin 12 pretendentë këtë vit për të marrë këtë çmim, që mëshiron frymën e natyrës sportive dhe arritjet.

“Sports Illustrated” u shpreh se Williams e mori çmimin pasi fitoi 53 nga 56 ndeshje të luajtur këtë vit.

34-vjeçarja është e para atlete femër që e merr këtë çmim nga revista, pas më shumë se 30 vitesh.

“Ajo e meritonte më shumë nga të gjithë këtë çmim. Serena ka pasur një vit të mrekullueshëm, mënyra sesi ka triumfuar në çdo aktivitet, fakti që ajo e ka bërë këtë për kaq shumë vite me radhë me rezultate kaq të larta”, deklaroi botuesi i “Sport Illustrated”, Paul Fichtenbaum.

Në nder të Williams, e konsideruar si tenistja femër më e mirë në botë, revista e famshme amerikane këtë vit titullin e këtij çmimi e ka ndryshuar nga “sportisti apo sportistja e vitit”, në “Personaliteti i vitit në sport”.