Pas anulimit të eventeve kulturore dhe sportive në mbarë botën, epidemia e Covid-19 ka prekur edhe modën.
Java e Modës së Meshkujve në Paris dhe në Milano është anuluar si pasojë e pandemisë së koronavrusit.
Organizata Franceze e Modës theksoi në një njoftim se “po punon në mënyrë aktive me anëtarët e saj për alternativa të mundshme”, pa sugjeruar një afat kohor.
“Në dritën e përhapjes së epidemisë Covid-19 në të gjithë botën, kërkohen vendime të forta për sigurinë dhe shëndetin e Shtëpive të Modës, të punësuarve të tyre dhe të gjithëve që punojnë në industrinë tonë. Si pasojë, Bordi i Drejtuesve të Federatës së Haute Couture dhe të Modës, ka marrë vendim që, në kushtet e tanishme, Java e Modës së Meshkujve në Paris, e planifikuar nga 23 qershori deri më 28 qershor 2020 dhe Java e Haute Couture e planifikuar nga 5 korriku deri më 9 korrik 2020, nuk mund të zhvillohet”, thuhet në njoftim.
https://www.instagram.com/p/B-P0tgnF6dk/
Vendimi u mor në një ditë kur vendi njoftoi një zgjatje të periudhës së izolimit kombëtar. Fillimisht ishte menduar për 15 ditë, por tani është zgjatur deri më 15 prill.
Ndërkohë, Java e Modës së Meshkujve në Milano ishte planifikuar për javën 19 – 23 qershor 2020, por tani do të shtyhet për t’u mbajtur në shtator 2020, kur do të zhvilohet edhe Java e Modës së Femrave.
Për momentin, dy sezonet e tjera kryesore evropiane të modës këtë verë nuk kanë ndryshuar ende datat e tyre: Java e Modës në Londër për burra dhe Pitti Uomo në Firence, të dyja të planifikuara për në qershor. Sidoqoftë, ato janë duke konsideruar disa forma alternative dixhitale të shfaqjeve që do të bëhen të ditura në vijim.
