Pasditen e sotme, një pacient 69-vjeçar ndërroi jetë në Spitalin Infektiv të qytetit të Tiranës. (Lexo këtu)
69-vjeçari ishte infektuar me Covid-19 dhe kishte gjithashtu sëmundje të tjera shoqëruese.
Fillimisht u njoftua se viktima kishte humbur jetën për shkak të virusit, megjithatë Ministria e Shëndetësisë e ka mohuar këtë lajm.
Në një njoftim zyrtar bëhet e ditur se Covid-19 nuk ka qenë arsyeja që 69-vjeçari nga Shkodra ka ndërruar jetë.
Ai vdiq si pasojë e hemorragjisë cerebrale dhe mësohet gjithashtu se prej 13 vitesh kishte tumor në kokë dhe kishte kryer 3 ndërhyrje.
Kështu, numri i viktimave të Covid-19 në vendin tonë vazhdon të mbetet 26.
Njoftimi i Ministrisë së Shëndetësisë:
Lidhur me lajmin e publikuar në media për vdekjen e një pacienti 69-vjeçar nga Shkodra me COVID-19, Ministria e Shëndetësisë dhe Mbrojtjes Sociale informon se:
Pacienti 69-vjeçar nga Shkodra që ka ndërruar jetë në spitalin infektiv, ka humbur jetën si pasojë e sëmundjes hemoragjisë cerebrale (aksidentit vascular hemoragjik).
69-vjeçari ishte prej 13 vitesh me tumor në kokë dhe kishte kryer 3 ndërhyrje. Kishte hemorragji cerebrale dhe ishte në gjendje të rëndë në koma.
Sipas spitalit infektiv, 69-vjeçari nuk ka ndërruar jetë si pasojë e COVID-19, pasi ishte bartës i virusit, por pa shenja të sëmundjes, (asimptomatik) dhe ka ndërruar jetë si pasojë e hemoragjisë cerebrale.
Ministria e Shëndetësisë i shpreh ngushëllime familjes së të ndjerit dhe informon se do të mbajë të informuar publikun për çdo zhvillim, ndaj lutemi t’i referoheni njoftimeve zyrtare.
