Një lajm i mirë na vjen nga Turqia, ku pacienti më i vogël që e ka mposhtur koronavirusin është vetëm 3 vjeç.
Sot vogëlushi la spitalin Universitar për Kërkim dhe Trajnim Mustafa Kemal në provincën jugore të Hatay-it, pas 15 ditësh nën kujdesin e mjekëve.
Kur u shtrua, djali kishte simptoma të etheve, kollës dhe probleme me frymëmarrjen.
“Pacienti ynë i ri fillimisht kishte probleme me frymëmarrjen. Kishte nevojë për një respirator për tri ditë, por iu përgjigj trajtimeve tona shumë shpejt”, tha Dr. Çigdem El në Departamentin e Shëndetit dhe Sëmundjeve të Fëmijëve për AA.
Nuk dihet sesi u infektua vogëlushi pasi familjarët e tij kanë rezultuar negativë në testin për koronavirusin.
Spitali do të vazhdojë monitorimin e vogëlushit për 4 javë, ndërkohë, familja është shprehur e lumtur që më në fund u takua me djalin për herë të parë pas trajtimit 15-ditor.
“U mërzitëm shumë pasi testet e tij të COVID-19 dolën pozitive. Fatmirësisht, fëmija ynë tani është i shëndetshëm. Ne po ashtu kemi marrë trajnime për masat kundër virusit”, tha babai i vogëlushit.
Turqia ka regjistruar afër 91 mijë raste të koronavirusit, ndërsa numri i të vdekurve aktualisht është 2100.
