Eksperti i Shëndetit Publik, Erion Dasho ka bërë një përmbledhje të situatës nga Covid-19 vendin tonë nëpërmjet një statusi në Facebook, ku shprehet se Ministria e Shëndetësisë nuk ka publikuar shifrat e sakta të viktimave dhe të prekurve.
Më tej mjeku nënvizon se stina e dimrit është afër dhe se shumë jetë do të kenë nevojë që të shpëtohen, duke shtuar se 80% deri 85% e pacientëve shërohen vetë.
Kështu, ai vijon duke shkruar se fatkeqësisht, për shkak të moshës dhe të sëmundjeve bashkëshoqëruese, si dhe në një numër të vogël rastesh për arsye ende të paqarta, një pjesë e pacientëve komplikohen dhe kanë nevojë për kujdes intensiv. Këtu hyjnë në lojë disa faktor.
Së pari, ai thotë se këta pacientë nuk kanë nevojë për mure të lyer dhe oborre spitalesh me bar, por për pajisje serioze. Nga ato pajisje që duhen blerë rregullisht dhe jo kur bie pandemia.
“iconstyle.al” prej kohësh e ka ndjekur me shqetësim këtë situatë, duke nxjerrë në pah disa pajisje që i duhet me urgjencë sistemit tonë shëndetësor.
Një ndër to është ECMO, një pajisje e kujdesit intensiv, shumë e vlefshme për të shpëtuar jetët e pacientëve të intubuar, që në vendin tonë nuk gjendet, por fatlumët udhëtuan drejt Turqisë për tu kuruar. Kjo pajisje kushton rreth 60-70 mijë euro dhe konsiderohet si pajisja e fundit e “mrekullive” në mjekësinë moderne. (KLIKO)
Së dyti, Dasho thotë se këta pacientë kanë nevojë për mjekë, infermierë dhe terapistë respiratorë me njohuri dhe aftësi bashkëkohorë dhe jo për protagonistë facebooku dhe instagrami.
Të gjithë jemi të vetëdijshëm se sistemi shëndetësor publik vuan nga numri i pamjaftueshëm i profesionistëve. Krahas mungesës së financimeve, mësohet se shkak për këto zhvillime është bërë edhe emigracioni i lartë i trupës shëndetësore jashtë vendit.
Sakaq, fakti që një pjesë e madhe e personelit mjekësor u infektua nga Covid-19 (zyrtarisht nuk kemi një numër) duket se e ka bërë të vështirë menaxhimin e situatës. Burime të sigurta pranë Infektivit kanë treguar për iconstyle.al se mjekë e infermierë, jo të fushës, janë detyruar nga instancat përkatëse për tu bërë pjesë e stafit të shërbimit infektiv, madje burimet shtojnë se janë kërcënuar edhe me heqje të licensës së infermierit. (KLIKO)
Së fundi, në këta pacientë shpesh ka nevojë të improvizohet, në këta pacientë minuta bën diferencën midis jetës dhe vdekjes, në këta pacientë jo rrallë të shpëton intuita dhe jo protokolli.
Postimi i plotë:
Edhe njëherë për ata që nuk janë sqaruar akoma! 80% deri 85% e pacientëve me COVID shërohen vetë. Detyra e mjekut të mirë të familjes është t’i monitorojë me kujdes, të mos u japë medikamente të panevojshme dhe t’u rekomandojë shtrimin në spital kur kanë komplikacione.Nga 15% e pacientëve që përfundojnë në spital, pjesa më e madhe kanë nevojë për trajtim të komplikacioneve kryesisht me antibiotikë dhe antikoagulantë. Pothuajse të gjithëve u nevojitet oksigjen në sasi dhe presione të ndryshme. Me menaxhim të mirë edhe këta pacientë në pjesën dërrmuese shërohen. Atyre u nevojiten mjekë që zbatojnë protokollet dhe i monitorojnë. Jo heronj! As supermenë!Ndonjë koleg patetik që akoma del me maska dhe skafandra për të tërhequr vëmendjen, thjesht është ca muaj i vonuar. Këto skena kishin kuptim në shkurt dhe në mars, në Wuhan, Lombardi dhe New York. Jo në Tiranë në shtator!!!Fatkeqësisht, për shkak të moshës dhe të sëmundjeve bashkëshoqëruese, si dhe në një numër të vogël rastesh për arsye ende të paqarta, një pjesë e pacientëve komplikohen dhe kanë nevojë për kujdes intensiv. Këtu hyn në lojë teknologjia, shkenca dhe heroizmi.Së pari, këta pacientë nuk kanë nevojë për mure të lyer dhe oborre spitalesh me bar, por për pajisje serioze. Nga ato pajisje që duhen blerë rregullisht dhe jo kur bie pandemia.Së dyti, këta pacientë kanë nevojë për mjekë, infermierë dhe terapistë respiratorë me njohuri dhe aftësi bashkëkohorë dhe jo për protagonistë facebooku dhe instagrami.Së fundi, në këta pacientë shpesh ka nevojë të improvizohet, në këta pacientë minuta bën diferencën midis jetës dhe vdekjes, në këta pacientë jo rrallë të shpëton intuita dhe jo protokolli.Nga 1 korriku kur rastet me COVID nisën të rriteshin ndjeshëm dhe deri më sot, dy spitalet COVID kanë trajtuar midis 400 dhe 600 pacientë të tillë. Shifra e saktë është mbajtur sekret nga ministria dhe këto vlera janë përllogaritur bazuar mbi ato pak informacione që raportohen.Në të njëjtën periudhë kanë humbur jetën 340 persona duke e bërë vdekshmërinë reanimatore nga COVID ndër më të lartat në botë.
Çdo vend i përgjegjshëm, çdo komitet i përgjegjshëm, çdo ministri e përgjegjshme analizon të dhënat me qëllim që të kuptojë ku vepron mirë dhe ku gabon. Kjo jo për të ndëshkuar, por për të përmirësuar cilësinë e kujdesit në javët dhe muajt që do të vijnë. Ky quhet përmirësim i vazhdueshëm i cilësisë dhe është një nga shtyllat e mjeksisë moderne. Për të gjithë këto arsye, ministria bën mirë të harrojë propagandën dhe kolegët të harrojnë patetizmat për t’ju përveshur punëve. Shqiptarët i pret një dimër i vështirë. Shumë jetë do të kenë nevojë të shpëtohen…
