Ditën e djeshme deputeti i PS-së, Paulin Stërkaj kaloi disa orë kritike për jetën e tij. Gjatë kohës që ndodhej në mbledhjen e Grupit Parlamentar të Partisë Socialiste, deputeti i Shkodrës pësoi ishemi cerebrale dhe u shtrua me urgjencë në spitalin e Neurologjisë pranë QSUT-së.
Burime pranë spitalit të Neurologjisë kanë bërë me dije për “Balkanweb”, se gjendja e deputetit sot paraqitet e stabilizuar. Tashmë ai mund të flasë dhe të lëvizë, megjithëse bluzat e bardha rekomandojnë që deputeti të qëndrojë i shtruar edhe për disa ditë të tjera për të parë reagimin e tij.
Kjo situatë e papritur ka qenë një goditje e madhe për familjarët dhe miqtë e tij të cilët i kanë qëndruar pranë në këtë situatë kritike për jetë e tij.
“Balkanweb” ka mësuar se ditën e hënë Stërkaj u ka treguar kolegëve se kishte pasur luhatje tensioni të cilat nuk i kishte vlerësuar shumë, por gjendja e tij u përkeqësua ditën e djeshme dhe ai përfundoi me urgjencë në spital.
Paulin Stërkaj përveçse deputet njihet edhe si një ndër sportistët më të mëdhenj në mundje, i cili është shpallur 12 herë kampion kombëtar.
Burimi: Balkanweb
