Opera Kombëtare Greke ka rihapur sërish dyert pas 7 muajsh mungesë për shkak të COVID-19. Bashkë me rihapjen e operës, është ringjitur në skenë pas 8 muajsh edhe sopranoja shqiptare Ermonela Jaho.
Sezoni i ri për operan greke ka nisur me “Madama Butterfly” nga Giacomo Puccini, që ka qenë një nga shfaqjet më të suksesshme për Ermonelën në mbarë botën. Ndërkohë Jaho është shprehur se është e çuditshme e po ashtu e vështirë, që të mos e shohësh të gjithë publikun e të mos e ndjesh energjinë e tij.
“Përpara dhe pas çdo shfaqjeje jam e përlotur, sepse ndihem me fat që jam atje. E puth skenën sa herë që marr duartrokitje. Ndoshta sepse mund të jetë hera e fundit. Ndoshta sepse shfaqja tjetër do të jetë pas disa muajsh. Emocionalisht është diçka e pabesueshme.
Më tepër se e çuditshme është paksa e vështirë të mos e shohësh të gjithë publikun, të ndjesh energjinë që përcjell ai. Por sërish, edhe nëse është një person i vetëm që të sheh, që krijon një lidhje me ty, është një arritje”, është shprehur Jaho.
Ndërkohë në vendin tonë Teatri Kombëtar i Operas dhe Baletit, si dhe gjithë teatrot e tjera në Shqipëri vazhdojnë të qëndrojnë të mbyllura.
