Më shumë se një në çdo 100 vdekje në mbarë botën është rezultat i vetëvrasjes, sipas një raporti të ri të publikuar nga Organizata Botërore e Shëndetësisë (OBSH), e cila ka bërë thirrje për veprime urgjente për të frenuar krizën globale të shëndetit mendor.
Sipas të dhënave më të fundit për vitin 2021, janë regjistruar rreth 727 mijë vetëvrasje në shkallë globale. Për çdo vetëvrasje të kryer, ka të paktën 20 tentativa të tjera. Vetëvrasja renditet si një ndër shkaqet kryesore të vdekjes te të rinjtë: është shkaku i dytë për vajzat 15–29 vjeç dhe i treti për meshkujt e kësaj grupmoshe.
Megjithëse ka pasur një rënie globale të normave të vetëvrasjes me rreth 35% që nga viti 2000, OBSH paralajmëron se progresi është i ngadaltë dhe i pamjaftueshëm për të përmbushur objektivin e uljes me një të tretën deri në vitin 2030.
Organizata shpreh shqetësim për përhapjen gjithnjë e më të madhe të çrregullimeve të shëndetit mendor, veçanërisht ankthit dhe depresionit, të cilat kanë tejkaluar ritmin e rritjes së popullsisë.
Përkundër nevojës në rritje, investimet globale në shëndetin mendor mbeten të ulëta, me shpenzime që përfaqësojnë vetëm 2% të buxheteve totale shëndetësore.
OBSH nënvizon se transformimi i shërbimeve të shëndetit mendor është një nga sfidat më të mëdha të kohës sonë dhe kërkon ndërhyrje të menjëhershme për të shpëtuar jetë.
