Qeveritë në Evropë po përballen me një “situatë të vështirë” për të kontrolluar numrin në rritje të rasteve të COVID-19, pasi qytetarët janë të lodhur me kufizime të reja në jetën e tyre të përditshme.
Mike Ryan, gjatë konferencës së sotshme në selinë e OBSH në Gjenevë tha se përhapja e virusit duhet të zvogëlohet.
“Padyshim, njerëzit janë të mërzitur dhe ata kanë të gjithë të drejtën të mërziten. Janë të lodhur. Por qeveritë, veçanërisht në Evropë, po përballen me një situatë shumë, shumë të vështirë. Ne duhet të zvogëlojmë përhapjen e virusit, të lehtësojmë presionin e kësaj epidemie. Opsionet e tyre janë të kufizuara, ” shtoi ai.
Shtetet evropiane po përballen me një situatë kritike, ndërsa kanë rikthyer masat kufizuese, si të vetmen mënyrë për të ndalur përhapjen e Covid-19.
Disa ditë më parë nisur nga situata ku jemi, Organizata Botërore e Shëndetësisë në Tiranë shkruante se muajt në vijim do të jenë shumë të vështirë dhe disa vende po ecin në trajketore të rrezikshme.
Mesazhi i plotë i OBSH:
Ne jemi në një moment kritik në pandeminë COVID-19, veçanërisht në hemisferën veriore, Përfaqësuesja e OBSh-së, Dr. Bettina Mene, ju tha pjesëmarrësve të një forumi shkencor që u zhvillua të mërkurën nga Akademia e Shkencave të Shqipërisë. “Muajt në vijim do të jenë shumë të vështirë dhe disa vende po ecin në në trajektore të rrezikshme.
Në fjalën e saj përmes lidhjes virtuale në forum, Dr. Menne theksoi se “OBSh-ja nxit udhëheqësit që të ndërmarrin veprime të menjëhershme për të parandaluar vdekjet e panevojshme, bllokimin e shërbimeve mjekësore dhe mbylljen e përsëritur të shkollave.”
Pas një përditësimi të situatës së Covid-19 dhe prezantimit të punës dhe përpjekjeve të OBSh-së për të luftuar pandeminë e virusit, kreu i zyrës së OBSh-së për Shqipërinë u shpreh se “vaksinat, diagnostikimi dhe terapitë efektive do të jenë jetike për t’i dhënë fund pandemisë dhe për të përshpejtuar rimëkëmbjen globale.”
“Por këto mjete jetëshpëtuese do të jenë efektive vetëm nëse janë të disponueshme për grupet më në nevojë në mënyrë të drejtë e të barabartë, dhe njëkohësisht për të gjitha vendet,” shtoi ajo.
Forumi Shkencor, “Pandemia e shkaktuar nga Covid-19 dhe përballimi i saj në Shqipëri dhe në botë,” trajtoi çështje kryesore të përgjigjes së bashkërenduar globale për Covid-19, shkencën pandemike, pasojat dhe masat e marra nga sistemet shëndetësore, si dhe rastin e pandemisë si një mundësi për rimëkëmbje ekonomike.
