Organizata Botërore e Shëndetit është shprehur se në këtë moment, kërcënimi më i madh i njerëzimit nuk është Covid 19, por mungesa e lidershipit global, sa i përket pandemisë.
Drejtori i përgjithshëm i OBSH, Tedros Adhanom Ghebreyesus gjatë një forumi virtual për shëndetin u shpreh se bota ka një nevojë të madhe për solidaritet global, duke shtuar se politizimi i pandemisë e ka përçarë atë.
“Kërcënimi më i madh me të cilin përballemi tani nuk është vetë virusi, është mungesa e solidaritetit global dhe udhëheqjes globale,” shtoi ai më tej.
OBSH gjithashtu ka thënë që pandemia po vijon të përshkallëzohet dhe se efektet e saj ekonomike dhe jo vetëm do të ndjehen për dekada.
Ditën e djeshme është shënuar numri më i lartë i rasteve të reja në një ditë të vetme me 183 mijë persona të prekur nga koronavirus.
Pjesa më e madhe janë në Brazil, të ndjekur nga Shtetet e Bashkuara dhe India, shkruan BBC.
Më shumë se nëntë milion persona në të gjithë botën rezultojnë të infektuar me koronavirusin, ndërsa 471,401 prej tyre e kanë humbur betejën me Covid-19.
