Të rinjtë italianë “egoistë” duhet të kenë më shumë fëmijë dhe më pak kafshë shtëpiake, tha Papa në një konferencë të organizatave pro-familjes në Romë.
Ai po fliste me kryeministren italiane Giorgia Meloni në një përpjekje për t’i nxitur liderët politikë të kthejnë një “dimër demografik” në vend, i cili vitin e kaluar pa një rënie të popullsisë prej më shumë se 300,000 personave.
“Le të mos e dorëzojmë veten ndaj mërzisë dhe pesimizmit steril,” tha Françesku në një mbledhje vjetore të organizatave pro-familjes në Romë.
“Të mos besojmë se historia është tashmë e shënuar, se asgjë nuk mund të bëhet për të kthyer trendin”.
Italia kishte një numër të ulët të lindjeve të gjalla në vitin 2022, në 392,598, krahasuar me një numër të lartë vdekjesh të regjistruara, në 713,499, e cila nënkupton se vendi ka përshpejtuar një prirje demografike që mund të ndikojë në sistemin e saj të sigurimeve shoqërore.
Zonja Meloni, e cila konsiderohet të jetë një udhëheqëse e krahut të djathtë në Itali dhe qeveria e saj, po mbështet një fushatë për të inkurajuar të paktën 500,000 lindje çdo vit deri në vitin 2033, që është shkalla që demografët thonë se është e nevojshme për të mbrojtur ekonominë nga kolapsi.
Shkalla e lindshmërisë në Itali është ndër më të ulëtat në botë, me 1.24 fëmijë për grua.
Mungesa e kujdesit të përballueshëm për fëmijët, paga e ulët dhe puna e paqëndrueshme janë ndër arsyet pse shumë gra e shtyjnë të kenë fëmijë.
Zonja Meloni, e cila ka një fëmijë me partnerin e saj, tha në konferencë se dëshiron të ndryshojë trendin në rënie të lindjeve, por paralajmëroi se surrogacia duhet të shmanget, duke prekur pikat më të gjera politike rreth emigrantëve dhe çifteve të të njëjtit seks.
“Ne duam një komb ku nuk është më skandaloze të thuash se pavarësisht nga zgjedhjet legjitime, të lira, prirjet e secilit – ne të gjithë kemi lindur nga një burrë apo një grua,” tha zonja Meloni.
“Aty ku nuk është tabu të thuash që mëmësia nuk shitet, se mitra nuk jepet me qira dhe fëmijët nuk janë produkte pa recetë që mund t’i zgjedhësh në raft sikur të jesh në supermarket dhe ndoshta t’i kthesh nëse produkti nuk përputhet me atë që prisni.”
Ajo foli gjithashtu në një kuptim fetar, duke thënë se qeveria e saj dëshiron të fillojë duke “respektuar dinjitetin, veçantinë, shenjtërinë e çdo qenieje njerëzore, sepse secili prej nesh ka një kod gjenetik unik dhe të papërsëritshëm. Dhe kjo, na pëlqen apo jo, ka diçka të shenjtë”.
