Hyrja në Australi e tenistit numër një në botë Novak Gjokovic është vonuar për shkak të një problemi me vizën e tij.
Lojtari mbërriti në Melburn ditën e sotme, ku autoritetet vunë re se ekipi i tij kishte bërë një gabim në aplikimin e tij.
Gjokoviç do të luajë në “Australian Open”, pasi u përjashtua nga rregullat e vaksinimit.
Por ekipi i tij nuk kishte kërkuar një vizë që lejon përjashtime mjekësore për të qenë të pavaksinuar.
Të gjithë lojtarët dhe stafi në turne duhet të vaksinohen ose të kenë një përjashtim të dhënë nga një panel ekspertësh të pavarur.
Djokovic ka zbritur në aeroportin Tullamar të Melburn dhe është në pritje të një vendimi. Ai nuk ka folur për statusin e tij të vaksinimit, por vitin e kaluar tha se ishte “kundër vaksinimit”.
Forcat kufitare të vendit kishin kërkuar sqarime nga qeveria e shtetit Viktorian në lidhje me aplikimin e tij, raporton gazeta “Ag”e me bazë në Melburn.
Por ministrja e qeverisë së shtetit, Jaala Pulford shkroi në Twitter se aplikimi i tij nuk do të mbështetej. Miratimi i vizave ishte një çështje e qeverisë federale, shtoi ajo.
Lojtari thuhet se është pyetur në një dhomë në aeroport. Vendndodhja e tij aktuale dhe statusi i vizave mbeten të paqarta.
Më herët, kryeministri i Australisë tha se yllit të tenisit do t’i refuzohet hyrja në vend nëse nuk siguron prova se nuk mund të vaksinohet për arsye mjekësore.
Organizatorët e turneut thonë se kampionit në fuqi nuk i është dhënë trajtim i veçantë, por vendimi ka zemëruar shumë australianë. Vendi po sheh dhjetëra mijëra raste të Covid-19 për herë të parë pasi duroi disa nga kufizimet më të rrepta në botë.
Mes polemikave, Morrison tha se lojtarit serb do t’i kërkohet të paraqesë prova pas mbërritjes se ai ka një përjashtim të vërtetë mjekësor nga vaksinimi. Australian Open fillon më 17 janar në Melburn.
“Nëse ato prova janë të pamjaftueshme, atëherë ai nuk do të trajtohet ndryshe nga askush tjetër”, u tha kryeministri gazetarëve. “Nuk duhet të ketë rregulla të veçanta për Novak Gjokoviçin. Asnjë”.
