Pavarësisht se kishte 5 vjet që nuk prodhonte më muzikë, kërkesës së Elvana Gjatës dhe dëshirës për të bashkëpunuar me të nuk mund t’i thoshte dot “Jo”.
Pirro Çako tregon shumë nga detajet se si erdhi bashkëpunimi mes tij dhe këngëtares shqiptare për koncertin e saj të parë.
Nga studio e “Rudina” pasditen e djeshme, Pirro tregoi prapaskenat e koncertit të disa ditëve më parë. Ai dhe Elvana kanë punuar shumë që 6 këngët të ishin në atë nivel prezantimi.
“Unë bëra një tërheqje dhe po mendoja të paktën të shoh ça duhet të bëj. Kisha menduar të bëja pikërisht këtë, një gjë të ngjashme me koncertin e Elvanës, madje kisha filluar të hidhja disa gjëra. Por vokali i Elvanës ka ngjyra të jashtëzakonshme. Unë, edhe nëse do të rikthehesha, nuk do ta kisha pasur të njëjtin ndikim si Elvana. Ne kemi punuar shumë, vetëm unë e Elvana e dimë sesa mund kemi derdhur…”, tha Çako.
Elvana ishte një arsye e fortë për t’u rikthyer, por nuk ishte e vetmja. Siç tregon Pirro, edhe dikush tjetër kishte kohë që i lutej të vazhdonte të krijonte muzikë:
“Unë e kisha mbyllur me muzikën. Kështu kisha menduar, por gjërat erdhën në mënyrë të atillë që më bënë të kuptoj se tani ishte momenti. Ndoshta i vetmi person që më bindi të rikthehem ishte edhe mamaja ime, sepse ishte i vetmi person që besonte tek unë”.
