Ishte adoleshent i viteve ’80, kur vendosi që të niste pasionin e tij për muzikën dhe të jepte maksimumin e tij, për atë që ëndërronte. Ishin të paktë ata që mendonin duke parë atë djalin e ri me një kitarë të vjetër, se një ditë mund të kthehej në ikonën e muzikës shqiptare.
Aleksandër Gjoka, i cili nisi fillimisht t’i këndonte dashurisë në shkallët e Amfiteatrit të liqenit, ishte ai që hodhi themelet e rock-ut në vendin tonë.
Një artist që diti të ruante vlerat e muzikës së mirëfilltë shqiptare, me zërin e tij karakteristik që herë pas here është quajtur si Vasco Rossi shqiptar, dhe që në fakt nuk ka asgjë më pak se i famshmi i italianëve, sot feston ditëlindjen e tij të 58-të të jetës.
Ai nuk numëron shumë klipe, e me siguri klikimet e këngëve të tij, një trend i artistëve të rinj që jetojnë vetëm për to, ai as nuk i shikon. Madje për të as informacione nuk mund të gjesh në internet, veç teksteve të këngëve dhe hiteve ndër vite.
Prej vitesh ai u ka munguar skenës shqiptare, por jo personave që e duan dhe e dëgjojnë muzikën e tij çdo fundjavë. Ndërsa nuk dimë se çfarë mendon artisti i mirënjohur shqiptar për 58 vitet e jetës së tij, ne jemi të bindur se ai i dha shumë muzikës së vendit tonë.
I urojmë ditëlindjen ikonës së rock-ut shqiptar dhe shpresojmë që ta kemi për shumë vite, për të na dëshmuar sërish se çfarë është muzika e vërtetë.