Gjëndja shëndetësore e këngëtares Celine Dion është përkeqësuar. Motra e Celine Dion, Claudette, ka ndarë një tjetër lajm lidhur me gjendjen e saj, e cila vuan nga një çrregullim i rrallë neurologjik që shkakton spazma të pakontrolluara të muskujve.
Claudette rrëfeu se motra tjetër e tyre Linda është shpërngulur në shtëpinë e Celine, dhe jeton aty bashkë me tre djemtë e saj, Rene-Charles, Eddy dhe Nelson. Ajo ka treguar se tani këngëtarja po përpiqet të gjejë ilaçe që i bëjnë mirë.
“Kur e telefonoj dhe ajo është e zënë, flas me motrën time Linda që jeton me të dhe ajo më thotë se po punon shumë. Ajo dëgjon nga studiuesit kryesorë në fushën e kësaj sëmundjeje të rrallë. Sinqerisht mendoj se ajo më së shumti ka nevojë të pushojë. Ajo gjithmonë përpiqet të jetë më e mira. Nuk mund të gjejmë asnjë ilaç që funksionon, por shpresa është e rëndësishme,”-u shpreh motra e këngëtares.
Këngëtarja e hitit “The Power of Love”, 55 vjeçe, ndau diagnozën e saj me fansat në dhjetor 2022, ku shtyu edhe turneun.
“Me zhgënjim të jashtëzakonshëm duhet të njoftojmë sot anulimin e Turneut Botëror. Më vjen shumë keq që ju zhgënjej të gjithëve edhe një herë,” tha ajo për ndjekësit e saj.
