Një ngjarje e rëndë ka tronditur qytetin Pawtucket në Rhode Island të SHBA, ku të shtënat me armë zjarri gjatë një ndeshjeje hokeji të një shkolle të mesme lanë dy persona të vdekur dhe tre të plagosur.
Policia konfirmoi se i dyshuari, Robert Dorgan, i njohur edhe si Roberta Esposito, u gjet i vdekur brenda arenës nga një plagë e vetëshkaktuar. Sipas autoriteteve, ngjarja dyshohet të ketë qenë e qëllimshme dhe mund të lidhet me një konflikt familjar.
Shefja e Policisë së Pawtucket, Tina Goncalves, bëri të ditur se identitetet e viktimave nuk janë bërë ende publike. Ajo shtoi se ndërhyrja e një kalimtari mund të ketë ndihmuar në përfundimin e shpejtë të incidentit.
Ngjarja ndodhi të dielën, në momentin kur lojtarët ndodheshin në akull, duke shkaktuar panik mes sportistëve dhe familjarëve të pranishëm në tribunë. Pamjet nga vendi i ngjarjes tregojnë momentin kur dëgjohen krismat dhe ekipet largohen me vrap nga arena.
Arena ku ndodhi incidenti ndodhet rreth pesë milje në veri të kryeqytetit të shtetit, Providence, dhe rreth 45 milje në jug të Bostonit.
Dëshmitarët përshkruan skena kaotike dhe momente frike. Melissa Dunn, nëna e njërit prej lojtarëve, tregoi se fillimisht mendoi se zhurmat vinin nga përplasjet e zakonshme gjatë lojës, por më pas pa ekipet e emergjencës duke u përpjekur të ndihmonin të lënduarit në tribunë.
“Mendimi i parë është: ku është fëmija im?”, tha ajo.
Ndërkohë, lojtari Olin Lawrence tregoi se ai dhe shokët e tij u fshehën në dhomën e zhveshjes sapo dëgjuan të shtënat. “Ishte shumë e frikshme. Kishte shumë të shtëna”, u shpreh ai.
Guvernatori i Rhode Island, Dan McKee, shprehu ngushëllimet për viktimat dhe familjet e tyre, duke theksuar se shteti është sërish në zi. Ai iu referua edhe një incidenti të mëparshëm me armë zjarri në Universitetin Brown, duke kërkuar solidaritet dhe mbështetje për komunitetin.
