Kishim gjithë verën që pyesnim veten përse qeveria vendosi të ndalonte muzikën pas orës 20:00, por asnjë nuk dinte të përgjigjej.
“Muzika transmeton Covid-19” u kthye në ironinë e rrjetit pasi ministrja e Shëndetësisë na njohu me vendimin, por mesa duket qeveria e mendon me të vërtetë këtë gjë.
Ose të paktën kështu ka deklaruar sonte njëri prej pjesëtarëve të kabinetit qeveritar.
Ministri i Turizmit Blendi Klosi ka habitur me deklaratën e tij në një intervistë për Report TV, ku është shprehur se valët e muzikës përhapin më shpejt Covid-19, ndaj dhe është vendosur që të mos lejohet muzika pas orës 20:00 të mbrëmjes.
“As Ministrit të Shëndetësisë nuk i duhet bërë kjo pyetje, por komitetit të ekspertëve, që gjykojnë se zonat me muzikë. Dhe kjo është e vërtetuar edhe shkencërisht, janë zonat ku virusi përhapet më shumë se në çdo vend tjetër. Kjo pasi valët e muzikës janë ato që përçojnë virusin. Në distancat ku ka valë muzike përhapja e virusit është më e madhe, edhe në ambientet me muzikë sidomos ku përdoret pija alkoolike, njerëzit duke qenë më pranë njëri tjetrit, lëshohen më shumë”, ka deklaruar Klosi.
Një fakt i tillë nuk na ishte përmendur deri tani nga asnjë ekspert, por pyetja është se kur muzika qenka e rrezikshme, pse nuk u ndalua edhe ditën?
Që prej muajit korrik, me vendim të qeverisë u ndaluan klubet e natës, diskot, “lounge bar” dhe çdo lloj shërbimi i kësaj natyre të luante muzikë pas orës 20:00. Mosrespektimi i këtij detyrimi, sipas Ministrisë së Shëndetësisë, dënohet me gjobë 1 milion lekë dhe në rast përsëritjeje me mbyllje të aktivitetit për 6 muaj.
