Nëse edhe ju ashtu si ne, jeni të dashuruar me vargjet që Desantila Vatnikaj publikon në blogun e saj apo me copëzat poetike me të cilat na surprizon herë pas here në rrjetet sociale, atëherë këtë muaj keni një arsye për t’u lumturuar.
Desantila po bëhet gati të hedhë në treg librin e saj të dytë, romanin e titulluar “Edhe unë”, që do t’ju përfshijë në një botë emocionesh nga ato të paprovuarat më parë, tek ato që të evokojnë kujtimet.
Më 10 nëntor, juristja e shndërruar në shkrimtare, do të bëjë prezantimin e romanit në një event me të ftuar të shumtë, e më tej, më 13 nëntor, romani do të ketë debutimin e tij në Panairin e Librit, për t’u shpërndarë në vijim në librari.
Përse duhet ta lexoj
Në letërsi, ashtu si në muzikë, kinematografi a forma të tjera arti, ne jemi të etur të gjejmë diçka që na përfaqëson, një copëz të vetes që të na tregojë se nuk jemi të vetëm në ndjesitë tona.
“Edhe unë”, siç sugjeron edhe titulli, të jep pikërisht këtë.
Personazhi kryesor i romanit, Hana, e çiltër dhe delikate por me një vendosmëri të çeliktë, do t’ju udhëheqë në rrugëtimin e jetës së saj ku pas një zemërthyerjeje të hidhur, fati do ta hedhë në krahët e një romance ëndrrash.
Në rrëfimin e saj ku emocionet zbërthehen në mënyrë “të pamëshirshme” deri në palcë, është e pamundur që herë pas here Hanën të mos ta përfytyrosh si vetë shkrimtaren Vatnikaj, e cila e ka krijuar me kaq dashuri personazhin e saj, aq sa në lexim të duket se ajo vetë po ta rrëfen historinë në një cep të errët lokali para një gote me verë.
Dhe pikërisht atëherë kur ti je përfshirë me shpirt në historinë magjepsëse të Hanës me Dartin, Vatnikaj, ashtu si jeta, të jep atë që më pak e pret dhe më besoni, nuk keni për ta pritur!
Një manual për dashurinë, lumturinë, një guidë për ngritjen në këmbë pas një rënieje të keqe ku secili gjen diçka nga vetja për të thënë në fund: Edhe unë!
/Iconstyle.al
