Princi William dhe Dukesha e Kembrixhit i prezantuan botës fëmijën e tyre të tretë, princin e ri të Mbretërisë së Bashkuar. Ai erdhi në jetë mëngjesin e sotëm rreth ores 11, në Spitalin St Mary në Londër dhe peshonte 3.8 kilogramë.
Ata qëndruan përpara hyrjes së spitalit për të përshëndetur turmën e njerëzve që mikpritën Princin e ri dhe për të shkrepur fotot e para. Edhe përse vetëm pak orë pas lindjes, Dukesha nuk nguroi të dalë përpara syrit të botës. Kate dukej rrëzëllitëse e veshur me te kuqe. Dukesha i pëshpëriti në vesh Princit William se është koha të kthehen brenda në spital, pasi bebi mund të ftohet.
Princi William tregoi sot sesa të lumtur janë Princesha Charlotte dhe Princi George për vëllain e tyre të vogël. Në një bisedë me mediat, William tha se Princi i sapoardhur në jetë nuk e la botën të priste për të, pasi dhimbjet e lindjes nisën në orën 6 të mëngjesit e në orën 11, degjuan të qarën e parë të tij.
I pyetur për emrin e bebit, i cili është i pesti në rradhë për fronin, ai tha se duhet të presim edhe pak.
