Kriza e shkaktuar nga Covid-19 ka prekur median dhe gazetarët po përballen me ulje të pagave megjithëse vazhdojnë të jenë në krye të detyrës, si dhe pushime nga puna.
Më shumë se kurrë, këto ditë gazetarët i janë nevojitur popullit për të informuar dhe ndërgjegjësuar lidhur me situatën e vështirë që të gjithë po kalojmë.
Teksa qeveria jep ndihma ekonomike për bizneset e vendit në kohë krize, e vetmja që përjashtohet është media.
Kryeministri u shpreh më herët se nuk mund të japë ndihmë për ata që bëjnë humor, duke i lënë mediat dhe gazetarët të pashpresë.
Me rastin e Ditës Botërore të Lirisë së Shtypit, përfaqësuesi i OSBE-së për Lirinë e Medias, Harlem Desir, bëri thirrje për respektim, liri dhe mbështetje financiare të mediave që po përballen me vështirësi ekonomike.
Përfaqësuesi i OSBE-së nënvizoi se shëndeti ynë varet jo vetëm nga mundësia për të pasur kujdes mjekësor, por edhe nga mundësia për të pasur informacion të saktë për pandeminë, zhvillimin e saj dhe mënyrat për të mbrojtur veten e të tjerët.
Mirëpo, të gjitha thirrjet vazhdojnë të shkojnë në vesh të shurdhër dhe qeveria vazhdon të heshtë para nevojave të gazetarëve.
Në një komunikim me “Iconstyle.al”, kryetari i Unionit të Gazetarëve, Aleksandër Cipa, u shpreh se nuk ka ende asnjë negociatë lidhur me lehtësirat për mediat dhe gazetarët.
Në këtë periudhë krize, qeveria vijon të bëjë një sy qorr dhe një vesh shurdh për mediat, pavarësisht thirrjes së përsëritur të iconstyle.al (lexo këtu), reagimit të Shoqatës së Gazetarëve Europianë, apo Unionit të Gazetarëve, për nevojën e përfshirjes së tyre planin financiar për përballimin e krizës së shkaktuar nga koronavirusi në Shqipëri.
Mediat në vend janë aktualisht në krizë, disa media audio-vizive dhe online kanë pezulluar përkohësisht pagat e gazetarëve, dhe të tjera media kanë reduktuar pagat e punonjësve në pamundësi për të përballluar situatën.
