Skandali shpërtheu kur gazeta “New York Times” njoftoi në një artikull tronditës se, Weinstein kishte arritur të paktën 8 marrëveshje “për të mbyllur gojën”, lidhur me akuzat për ngacmime seksuale.
Bordi drejtues i “Weinstein Co.” e shkarkoi menjëherë manjatin e turpëruar të filmit, njëkohësisht bashkëkryetar të saj, Harvey Weinstein, por e ardhmja e firmës tani është e paqartë.
Kryeredaktori i revistës “The Hollywood Reporter”, Matthew Belloni e ka ndjekur nga afër lajmin për producentin e famshëm të “Hollywood”-it.
“Pyetja kryesore që shtrohet, kur vihet në diskutim aftësia e kompanisë ‘Weinstein’ për të ecur përpara, është sa ishin drejtuesit e tjerë të saj në dijeni të këtyre veprimeve? Kam përshtypjen që do t’iu duhet për çdo rast të ndryshojnë emrin. Ky do të ishte një hap i parë drejt pastrimit të imazhit”, tha Matthew Belloni, kryeredaktor i “The Hollywood Reporter”.
Meryl Streep dhe Judi Dench iu përveshën të hënën Weinsteinit, një njeri të cilin e kishin vlerësuar lart, pa qenë në dijeni, siç thanë, të veprimeve të tij të turpshme me femrat.
Aktorët George Clooney dhe Jennifer Lawrence, i janë bashkuar dënimit që po i bëhet producentit të filmave, Harvey Weinstein, pas pohimeve se ai i ka ngacmuar seksualisht gratë për dekada të tëra.
Producenti ndihmoi Jennier Lawrence ta fitojë çmimin “Oscar” për filmin “Silver Linings Playbook”, si dhe ia dha Clooney-t suksesin e parë në film te “From Dusk Till Dawn”.
Ndërsa në një intervistë natën e kaluar, Clooney e quajti sjelljen e Weinstein “të pambrojtshme”, duke shtuar që “problemi është tejet i rrënjosur në shoqërinë tonë”.
“Është e pambrojtshme. Kjo është fjala e vetme me të cilën mund ta fillosh”, tha ai.
“Harvey e ka pranuar, është e pambrojtshme. E kam njohur Harveyn për 20 vjet”, tha Clooney për Daily Beast.
Në anën tjetër, aktorja Jennifer Lawrence, e dënoi sjelljen e producentit ndonëse tha se kurrë nuk kishte dëmtuar ndonjë sjellje të tillë të tij.
“Isha thellësisht e shqetësuar kur dëgjova lajmet për sjelljen e Harvey Weinstein. Ky lloj abuzimi është i pajustifikueshëm dhe absolutisht tronditës”, tha ajo për Variety.
