Floriani ka vetëm një peng: do që ta shikojë të lumtur babain e tij.
Por fatkeqësisht, një trombozë para disa vitesh, ia bëri të pamundur Zefit që të mund të jetonte i lumtur pranë fëmijëve të tij.
Nga ana tjetër, edhe Zefi ka patur vetëm një qëllim në jetën e tij: që fëmijëve të mos u mungojë asgjë. Por, problemet shëndetësore që i erdhën si pasojë e trombozës, e bënë të humbasë motivimin se do të mund t’u jetë pranë në çdo kohë.
Nga spitali në spital për të kërkuar shërimin, fëmijët e kanë vënë re se i ati nuk është si më parë. Për këtë arsye, Floriani kërkoi t’i jepte një mesazh babait të tij Zefit sot në “Dua të të bëj të lumtur”.
“Babi, unë kam ardhur këtu sepse në jetën time kam bërë shumë gabime”, u shpreh Floriani, “Por, ty nuk të kam parë kurrë të lumtur. Të premtoj se do të jem pranë teje kudo ku do të shkosh, ashtu siç ke qëndruar ti pranë meje.”
“Të kam sjellë këtu, për të të thënë se jam krenar që të kam baba dhe se, të dua shumë. Prandaj, jetoje jetën për ne.”, ishte mesazhi prekës i Florianit.
Një surprizë e papritur ishte për Zefin kur pa se, në anën tjetër, ishte i biri. Shumë i lumtur për këtë surprizë, ai premtoi se nuk do ta humbasë shpresën.
