Është ulur ndjeshëm numri i vatrave të COVID-19 në Tiranë, nga 17 që ishin në 9 vatra aktive.
“Dosja.al” shkruan sot se 9 vatrat aktive janë identifikuar dhe ndodhen kryesisht te: Rr. Dibrës, rr. Ura, Tirana e Re, rr. Sami Frasheri, rr. Dalip Topi, Shkoze, rr. Kole Kamsi, Mozaiku i Tiranës, Qytet Studenti, Lunder, Teleferik, ish-teatri, Vasil Shanto, Kodra e Diellit 2.
Burime nga ISHP bëjnë me dije se gjatë 24 orëve të fundit në Tiranë janë hetuar 44 raste, nga të cilat 17 janë referuar nga Urgjenca Kombëtare, 1 nga mjeku i familjes dhe 26 të tjera janë kontakte të personave pozitivë.
Ndërsa në total janë analizuar 122 monstra, ku 96 personave u është marrë tamponi, 26 kanë qenë në kontakt me virusin dhe 32 të tjerë janë ritestuar.
Gjithashtu, 26 punonjësve të Fondit të Sigurimit të Detyrueshëm të Kujdesit Shëndetësor u janë marrë monstrat, pasi kanë qenë në kontakt me një person të infektuar.
Dje, rastet e reja të regjistruara në Shqipëri ishin 42, numri më i lartë i regjistruar që nga fillimi i epidemisë. Ministrja e Shëndetësisë, Ogerta Manastirliu deklaroi se ecuria e epidemisë “është brenda pritshmërisë”.
Dje ndërroi jetë një tjetër paciente me koronavirus. 81-vjeçare sipas ministrisë së Shëndetësisë, ndërroi jetë jo për shkak të infeksionit por nga sëmundjet shoqëruese.
