Europa ka disa prej kryeqyteteve më të bukura por pa diskutim edhe më të shtrenjta dhe luksoze.
Nga Parisi, Vjena, Moska e deri tek Barcelona, Praga, Budapesti apo Roma, janë që të gjithë qytete jo vetëm të bukur por edhe të shtrenjtë.
Megjithatë ai që është në majë të listës është në një shtet si Zvicra, dhe pikërisht Zyrihu.
Ky qytet renditet në vend të parë, si qyteti më i shtrenjtë në botë sipas sondazhit nga “Indeksi i Kostos Botërore të Jetesës” (WCOL) i EIU. Studimi mat koston e 200 gjërave, përfshirë strehimin, transportin, ushqimin, veshjet, sendet shtëpiake dhe argëtimin në shumë qytete të botës.
Kombinimi më i mirë i një qyteti ultra-modern dhe një fshati të vogël sharmant, patjetër që është Zyrihu, por vetëm se është mjaft i kushtueshëm.
Duhet theksuar se transporti, ushqimi dhe akomodimi, nuk janë aspak të lira, shpenzimet tuaja do të jenë të mëdha. Por, sa kushton në të vërtetë të jetosh në Zyrih?
Të hash jashtë në Zyrih është shtrenjtë. Do të gjeni restorante dhe kafene në çdo distrikt, dhe që të gjitha shërbejnë ushqim të kualitetit të lartë.
Një shujtë në një restorant mesatar mund të kushtojë nga 16 deri në 30 euro, dhe as ushqimi i shpejtë nuk është i lirë në Zyrih.
Supermarketet më të mëdha në Zyrih janë “COOP”, “Migros” dhe “Spar”. Vetëm mbajeni në mend se mishi është një ndër produktet më të shtrenjta.
Shumica e birrave në baret lokale dhe kafenetë, kushtojnë rreth 7 euro dhe një shishe verë kushton nga 8 deri në 21 euro (të paktën).
Natyrisht, askush nuk ulet vetëm në bar dhe të porosisë një pije. Kështu që një natë e plotë me pije mund t’ju kushtojë nga 45 deri në 65 euro nëse nuk jeni të kujdesshëm.
Nga ana tjetër, transporti publik në Zvicër është një nga më të mirët dhe më efikasët në botë. Ndryshe nga vendet e tjera, biletat janë të shtrenjta. Në Zyrih, do t’ju kushtojë mesatarisht 7 euro në ditë dhe rreth 13 euro për udhëtimet jashtë qytetit.
/Burimi: BBC/ Përshtati: Iconstyle.al/
