E keni parë në bashkë-prezantimin e Këngës Magjike, ndërsa tani nuk “shkitet” nga ekrani çdo pasdite ku nga Dhërmiu sjell shijen e detit dhe pushimeve në emisionin “Edicioni Veror”. Bëhet fjalë për gazetaren Genta Hodo, e cila ka nisur me hapa të ngadaltë por të sigurtë rrugën drejt suksesit në median shqiptare. Zërin e Gentës dhe imazhin e saj nuk e keni të panjohur, pasi na ka shoqëruar përgjatë fëmijërisë, teksa shfaqej në “RTSH” në rolin e “Pipi Çorapegjatës”. Për “iconstyle.al” ajo rrëfen të pathënat e ekranit, eksperiencën në “Jo Vetëm Modë” si dhe një çështje “të dyshimtë” në lidhje me Ledri Vulën.
Menjëherë sapo kujtojmë “Pipi Çorapegjatën” shqiptare na vjen në kujtesë vajza me faqet e rrumbullakëta dhe flokët gërshetë. Rrëmo pak në kujtesë dhe na thuaj emocionet që përjetove gjatë kësaj experience të parë në ekran?
E beson që thuajse s’e mbaj mend fare? Megjithatë, roli i Pipi Çorapegjatës në emisionet për fëmijë të RTSH më ka shenjuar përgjithmonë. Kujtoj se më spikatën nga një emision, ku u kisha dedikuar nga një vjershë regjisores dhe prezantueses së emisionit (shiko çfarë servileje e vogël lol). Pak ditë më vonë, një telefonatë dhe u gjenda duke xhiruar në Divjakë me dy bishtalecë që rrinin lart të mbajtur nga një tel shkuar pas koke. Dhembjeeee… Pjesa tjetër ka kaluar si nëpër ëndërr. Ka qenë fantastike. Por, nuk ishte e lehtë të ishe në qendër të vëmendjes në atë moshë. Ndonjëherë më duket sikur s’e kam jetuar fëmijërinë sa duhet.
Pas shumë vitesh, katapultohesh sërish në median shqiptare dhe të shohim në bashkë-prezantimin e “Këngës Magjike”. Të kishin munguar emocionet përballë kamerave?
Shumë! Ishte magjike! Provat non stop tek Pallati i Kongreseve, diskutimet me Dalinën për skenarin, batutat në prapaskenë me Besin dhe Erjonin… Pastaj kur erdhi nata e parë e Këngës Magjike… Shumë emocione. Për fat të mirë, kisha pranë dy vajza fantastike, Dean dhe Megin, pra ndihmuam njëra- tjetrën. Megjithatë, lexova shumë komente jo fort pozitive vërdallë dhe kjo më bëri të kuptoj se duhet të tregohemi më mbështetës ndaj njëri- tjetrit, veçanërisht kur bëhet fjalë për të rinj të talentuar. Edhe unë vetë dikur e shikoja Këngën Magjike nga divani dhe më pëlqente të kapja defekte, jo pse e tha, jo si e tha. Por, kur njoha nga afër gjithë punën intensive dhe korrektësinë e frikshme me të cilën punonte Gjebrea dhe i gjithë stafi i tij, aty e kuptova pse ai është aty ku është.
Sapo përmbylle sezonin e parë si gazetare e emisionit “Jo Vetëm Modë”! A do të kemi një sezon të ri të emisionit?
E përse të mos ketë? Sezoni i fundit tregoi se është një format i pëlqyer, që e ka fituar shikuesin e vet dhe mendoj se sekreti i kësaj, është se temat e përditshmërisë, trajtohen me një këndvështrim krejt tjetër.
Ishte përvoja ime e parë në gazetarinë televizive. Po të mos e kisha provuar vetë, nuk do e dija sa shumë mund kërkon ajo kronikë 5-minutëshe që ne e shijojmë si gjënë më të thjeshtë në botë. Kam akoma shumë për të mësuar dhe po ia testoj durimin Enit (Shehut) deri në fund.
Këtë verë je zhvendosur në jug të Shqipërisë, ku së bashku me kolegun Eni Shehu dhe Fjorda Llukmanin do të kalojmë perëndimet gjatë stinës së verës. Çfarë mund të na thuash për këtë eksperiencë?
Kjo paska qenë puna e ëndrrave! Jemi shpërngulur në Dhërmi për të punuar këtu dhe s’besoj të ketë vend më frymëzues për të punuar. Megjithatë, është punë shumë intensive, sepse emisioni është live nga e hëna në të hënë dhe gjithçka pasqyrohet thuajse në kohë reale. Rrallë na qëllon të takohemi të tre, sepse Eni s’i lë të bien në tokë aktivitetet më të veçanta të zonës, kurse Fjorda është zakonisht duke bërë ndonjë udhëtim të çmendur nëpër ca vende që një Zot e di si i zbulon. Unë s’jam shumë sportive nga natyra, rrëzohem vend e pa vend. Pjesa ime janë këshillat për plazhin, me atë rrugë mësoj edhe vetë të bëhem pak më praktike.
Pak ditë më parë në transmetim u shprehe se “Ledri Vula të ishte ngjitur pas”. Si qëndron puna?
Po ja, si ta shpjegoj…Mes meje dhe Ledrit ekziston një lidhje shumë e fortë. Jemi lindur të dy në korrik, të dy hot, të dy të rinj dhe single unë, single ai, single asnjoni.
Shaka kjo! Edhe ajo që thashë atje në emision, shaka ishte. Eni po na ngacmonte se përse nuk e kishim shoqëruar tek intervista me Ledrin dhe unë ia ktheva me shaka që gjasme s’po e heq dot qafe. Ç’e do që ngeli si tip historie. Tani ma përmendin gjithë kohës.
Ke përjetuar emocionet para dhe pas kameras! Pas këtyre eksperiencave, ku do e shohim Gentën në të ardhmen?
Kënga! Kam gati një këngë që do t’ju pëlqejë, veçanërisht nëse e keni provuar të jeni high ndonjëherë. Diçka e veçantë. Klipi do të publikohet me gjasë në fund të verës.
Më poshtë mund të ndiqni edhe videon e “Pipi Çorapegjatës”.
Iconstyle.al
Për t’u njohur të parët me lajmet më të fundit nga showbiz-i, moda, bukuria, aktualiteti etj., shkarkoni falas aplikacionin e iconstyle.al
iOS: (Kliko Këtu)
Android: (Kliko Këtu)
