Shtatori po afron dhe bashkë me sezonin e ri televiziv ka nisur edhe një nga periudhat më interesante të ekranit shqiptar: merkatoja e moderatorëve dhe personazheve të njohur. Këtë vit lëvizjet duken veçanërisht të forta, me ndryshime në disa prej programeve më të ndjekura, rikthime të bujshme dhe negociata që mund të sjellin surpriza.
Një prej formateve që pritet të ndryshojë ndjeshëm është “Për’puthen”. Megi Pojani nuk pritet të vazhdojë në moderim, ndërsa emri që po lakohet për ta zëvendësuar është Heidi Baci. Ndryshimet nuk mbarojnë këtu. Ronaldo Sharka pritet të marrë autorësinë e programit, ndërsa për karriget e opinionistëve përfliten Arjan Konomi, në atë që do të ishte një rikthim në format, dhe Erjola Doçi.
Një tjetër rikthim që po bën zhurmë është ai i Agron Llakajt. Pas eksperiencës në Vizion Plus, aktori dhe moderatori raportohet se do të rikthehet në Top Channel dhe pikërisht në “Portokalli”, programin me të cilin është identifikuar për vite. Ai pritet të marrë vendin e Salsano Rrapit, ndërsa Xhemi Shehu do të vazhdojë të jetë pjesë e spektaklit, këtë herë edhe më e angazhuar në rolet humoristike.
Ndryshime të rëndësishme priten edhe në “Fiks Fare”. Pas rreth 25 vitesh në krye të emisionit investigativ, raportohet se Filip Çakulli largohet nga formati. Në raportimet për sezonin e ri përmenden gjithashtu largimet e Xhemi Shehut dhe Jul Dedës nga emisioni, ndërsa mbetet për t’u parë se cilët do të jenë emrat që do të marrin drejtimin e versionit të ri.
Edhe “Goca dhe Gra” pritet të vijë me ndryshime. Selin Bollati, fituesja e edicionit të fundit të “Big Brother VIP Albania”, raportohet se do t’i bashkohet panelit të programit në Top Channel. Nga ana tjetër, Sherina Spahiu ka lënë të kuptohet se rrugëtimi i saj në program ka përfunduar.
Ndryshime priten edhe në “Në Shtëpinë Tonë”, ku Julka Gramo raportohet se nuk do të vazhdojë më në rolin e moderatores.
Por një nga pikëpyetjet më të mëdha të kësaj merkatoje mbetet Bora Zemani. Emri i saj u lidh fillimisht me një largim të mundshëm nga Top Channel dhe madje me drejtimin e “Ferma VIP”. Megjithatë, deri tani nuk ka një konfirmim për kalimin e saj në një televizion tjetër. Informacionet që qarkullojnë sugjerojnë se Bora mund të mos ketë një program në nisje të sezonit të ri, ndërsa po i kushton vëmendje edhe brandit të saj “Zeman”.
Dhe kur flitet për rikthime në Top Channel, një emër po qarkullon më shumë se të tjerët: Luana Vjollca.
Prej muajsh përflitet se moderatorja mund të rikthehet në televizionin ku realizoi disa prej projekteve të saj më të suksesshme. Madje është përmendur edhe një rikthim i mundshëm i “Shiko Kush Luan”, ndoshta në një version të rifreskuar. Afrimi i saj me personazhet kryesore të Top Media dhe daljet e fundit televizive i kanë shtuar edhe më shumë dyshimet, por deri tani rikthimi nuk është zyrtarizuar.
Një tjetër emër që ka ndezur menjëherë rrjetin është Arbana Osmani. Afrimi publik me Ledion Liçon solli menjëherë spekulime për një rikthim të mundshëm të saj në Top Channel, por skenari që raportohet aktualisht është tjetër. Arbana pritet të vazhdojë me “Ferma VIP”, me përgatitjet për sezonin e ardhshëm që thuhet se kanë nisur.
Ndërkohë, “Big Brother VIP Albania” do të rikthehet, ndërsa Ledion Liço mbetet emri kryesor për drejtimin e reality show-t.
Edhe Alketa Vejsiu është futur në vorbullën e merkatos. Pas rikthimit të saj në Top Channel si opinioniste e ftuar në “Big Brother VIP”, nisën menjëherë zërat për një afrim më të madh mes palëve. Është raportuar se moderatores mund t’i jetë propozuar një projekt në Top Channel, por deri tani nuk ka konfirmim se Alketa largohet nga TV Klan apo se ka firmosur me Top-in. Po ashtu, zërat që e lidhnin me moderimin e “Big Brother VIP” nuk rezultojnë të konfirmuar.
Lëvizje ka edhe në Vizion Plus. Krahas vazhdimësisë së pritshme të Arbanës me “Ferma VIP”, largimi i Agron Llakajt drejt Top Channel lë një boshllëk të rëndësishëm. Nga ana tjetër, Fjodora Fjora pritet të rikthehet në ekranin e Vizion Plus, ndërsa është raportuar edhe largimi i Syrjanit nga “Mesditë”.
Ndryshime po ndodhin gjithashtu në programet e paradites. Bora Shahini është larguar nga A2 CNN, ndërsa në vendin e saj pritet të vijë Anila Çela. Kjo e fundit largohet nga drejtimi i “Vila 24”, ku drejtimin pritet ta marrë Valbona Mhilli.
Por Top Channel dhe Vizion Plus nuk janë të vetmet televizione që po lëvizin gurët. RTSH po përgatit një riformatim të konsiderueshëm për sezonin e ri, me një sërë emrash që po diskutohen për projekte të reja.
Mes tyre përfliten Eva Murati, Arvin Kita, Klotilda Harka, Matilda Terpollari, Elona Jacellari, Bojken Lako, Gjergj Kaçinari dhe Alba Çobaj. Për prime time po flitet për një prani më të madhe të spektakleve muzikore dhe artistike, ndërsa Alfred Kaçinari dhe Shpëtim Saraçi lidhen me projekte muzikore live. Në diskutimet për sezonin e ri janë përmendur gjithashtu Anjola Hamzaj, Krist Martiro dhe Sonila Agostini.
Megjithatë, jo çdo emër që po qarkullon në merkato ka firmosur kontratën. Një pjesë e lëvizjeve janë thuajse të konfirmuara, ndërsa të tjera mbeten negociata apo zëra që presin zyrtarizimin.
Një gjë duket e sigurt: shtatori pritet të sjellë një televizion shqiptar me shumë karrige të ndërruara. Nga “Për’puthen” te “Portokalli”, “Fiks Fare”, “Goca dhe Gra”, “Ferma VIP” e deri te “Big Brother VIP”, sezoni i ri mund t’i gjejë disa prej emrave më të njohur të ekranit pikërisht aty ku publiku nuk i priste.
