Qeveria greke ka vendosur të pranojë që udhëtarët që do të hyjnë në territorin grek që prej datës 19 dhjetor, përveç testit negativ PCR do të lejohen edhe me rapid test, ndryshe nga çfarë ishte lajmëruar një ditë më parë.
Ky njoftim u bë nga vetë ministri grek i shëndetësisë Thanos Plevris i cili pohoi se ka dërguar pranë pikave kufitare, porteve dhe aeroporteve të vendit qarkoren përkatëse.
Sipas ministrit, të gjithë udhëtarët mund të kryejnë rapid test jo më herët se 24 orë përpara udhëtimit të tyre, ose test PCR jo më herët se 72 orë përpara hyrjes së tyre në Greqi.
Sipas tij, ky vendim u mor për të mos dëmtuar planifikimin e familjeve që dëshirojnë të kalojnë festat në Greqi, pasi kosto e rapid test varion nga 10-20 euro, ndërsa e testit PCR nga 50-70 euro, e parë si një kosto shtesë për buxhetin e një familjeje të mesme.
Plevris tha se janë marrë masa shtesë në të gjitha pikat hyrëse të vendit duke shtuar personelin që kryen testimet anti Covid në kufi, me qëllim rritjen e kapaciteteve hyrëse në vend.
Në vazhdim, Greqia nuk do të ketë një mbyllje tjetër të kufijve por në çdo rast do të merren masa për parandalimin e hyrjes në vend të mutacionit “Omicron”.
Deri tani në Greqi janë diagnostikuar me këtë mutacion 10 persona.
