Tërmeti shkatërrimtar i 26 nëntorit, la pas 51 viktima dhe qindra të plagosur. Përpos jetëve të humbura, dëmi ekonomik ishte shumë i madh, pasi qindra shtëpi mbetën të pabanueshme, duke bërë që mijëra persona,të jenë pa çati mbi kokë.
Pak momente më parë Ministri Fuqiplotë, Bledi Çuçi, publikoi një raport paraprak, ku 13.294 qytetarë janë të pastrehë. Nga këto 4149 janë strehuar në hotele, 395 në qendra sociale, 254 në palestra, 7383 në çadra dhe 1000 të tjerë ndodhen në Kosovë.
Kryeministri Edi Rama në një mbledhje të qeverisë, tha se brenda dhjetorit, të gjithë personat që ndodhen në hotele, do të zhvendosen në shtëpi me qira. Për të mundësuar pagesën, Bashkitë Durrës, Lezhë e Tiranë kanë miratuar bonuset e qirasë. Në Tiranë bonusi është miratuar për 922 familje, ndërsa në Durrës për 666.
Për të përfituar nga bonusi i qirasë, duhet të dorëzoni këto dokumente:
- Vertetimi nga njësia administrative që shtëpia është e pabanueshme
- Akt-konstatimi nga grupet ne terren që merret në Bashki
- Çertifikata familjare
- Llogaria bankare
Kriteret për përcaktimin e vlerës së bonusit me vendim qeverie janë:
- Madhesia e familjes
- Tipi i banesës
- Çmimi mesatar që ka në treg
Mirëpo kjo procedurë ngre dyshime për transparencën, pasi nuk përcaktohet shuma për çdo kategori. Nga rastet e konstatuara në terren, rezulton se për të njëjtin numër personash, bonusi i qirasë ka qenë i ndryshëm. Shumat variojnë nga 180, 200 dhe 220 në muaj. Nuk mjafton vetëm kjo, pasi bonusi i qirasë do të lëshohet në momentin, kur në bashki dorëzohet kontrata.
Nisur nga vëzhgimet në terren rezulton, se qiratë në Durrës dhe Tiranë kanë pësuar një rritje nga tërmeti. Pronarët e shtëpive të dëmtuara nga tërmeti, kanë përfituar nga situata për të rritur me 50 mijë apo 100 mije lekë qiratë. Një shtëpi, qiraja e së cilës ishte 200 mijë lekë të vjetra përpara tërmetit, tashmë vlera ka shkuar në 250 mijë lekë të vjetra apo edhe më shumë.
Duke krahasuar bonuset e aplikuara deri më tani dhe çmimet e qirave në treg, rezulton se nuk janë në raport të drejtë. Kjo do të thotë se bonusi i lëshuar nga bashkia nuk mbulon çmimin e qirasë. Sikur të mos mjaftonte kjo, një pjesë e shtëpive me qira në Durrës kanë dëmtime nga tërmeti, por kjo nuk i ka penguar pronarët që të kërkojnë qiradhënës.
Gjatë periudhës së post tërmetit ka pasur probleme edhe me strehimin e qytetarëve, që kanë mbetur pa shtëpi. Shumë qytetarë të Durrësit kanë aplikuar për t’u strehuar në hotele, por gjithçka ka mbetur vetëm te aplikimi, pasi askush nuk është interesuar më. Disa prej tyre kanë gjetur rrugë alternative për t’u strehuar tek të afërmit, por nuk dihet për sa kohë.
Ndërsa në zonat e Laçit, Mamurrasit shumë banorë presin që t’u çohen çadra dimërore, pasi aktualet nuk janë të favorshme, për të përballuar të ftohtin e dimrit./gazetareforma
