Kur flasim për papunësinë në Shqipëri e veçanërisht për atë mes të rinjve, mund të numërohen ankesa pafund sesi punëdhënësit kërkojnë vite eksperiencë edhe për të porsadalurit nga bankat e shkollës, apo sesi i mbajnë në periudha të stërgjata prove vetëm për t’u thënë në fund se nuk e shohin më të arsyeshme të punësojnë njeri. Por na besoni, një listë të tillë ankesash, ndoshta edhe më të gjatë, e kanë edhe vetë punëdhënësit. Ndaj, nisur nga audicionet e fundit në “iconstyle.al” për të përzgjedhur një gazetare, ju sjellim një listë me 6 gabimet thelbësore që nuk duhet të bëni kur aplikoni për një punë.
Kontrollojeni 1000 herë CV-në për gabime
Korrektësia nis që nga CV-ja. Në ndonjë fushë tjetër, një punëdhënës me shumë mundësi mund të mos i kushtojë aspak rëndësi gabimeve drejtshkrimore në një CV. Por mendoni se e njëjta gjë funksionon edhe në gazetari? Eh, ashtu mendojmë dhe ne!
Mos shkoni të papërgatitur në një intervistë
Nëse e doni vërtet atë pozicion pune, atëherë duhet të përgatiteni të jepni më të mirën tuaj në intervistë. Të mos kesh asnjë informacion për kompaninë ku po aplikon për punë tregon rrjedhimisht se nuk ke interes për punën. Gjithashtu, në varësi të pozicionit për të cilin aplikoni, përgatituni për ndonjë provë të vogël pasi nuk janë të paktë punëdhënësit që e kërkojnë një gjë të tillë që në fazën e intervistës.
Mos gënjeni
Siç na kanë mësuar prindërit që kur ishim fëmijë, gënjeshtra i ka këmbët e shkurtra, ndaj nuk ia vlen barra qiranë të gënjeni në një intervistë pune, pasi zbulimi i kësaj gënjeshtre, mund t’ju lërë pa punë në të ardhmen vetëm për faktin që keni gënjyer.
Mos u bëni të bezdisur
Me shumë gjasa, punëdhënësi apo personi i ngarkuar me punësimet në një kompani, ka dhe detyra të tjera për të kryer, ndaj dhe përgjigja (qoftë pozitive, qoftë negative), mund të mos vijë 1 orë pas intervistës, siç mund të mendojë dikush… Nëse nuk kontaktoheni brenda 1 jave, një mesazh apo email i shkurtër i tipit: “Përshëndetje, doja t’ju falenderoja dhe njëherë për intervistën. Mbetem në pritje të një përgjigjeje.” mjafton. Askush nuk do të punësojë një person që të çmend me mesazhe apo telefonata këmbëngulëse për të marrë një përgjigje.
Për hir të Zotit, mos i dërgoni zile një punëdhënësi potencial
Po, ka ndodhur edhe kjo! Kujtoni në çdo çast se personi të cilit po i drejtoheni mund të jetë shefi juaj në të ardhmen ndaj nuk mund të komunikoni me të në të njëjtat mënyra siç do të bënit me shokët e gjimnazit, për ta rikujtuar për intervistën tuaj.
Mësohuni të pranoni një “Jo” si përgjigje
Nuk është e vërtetë se arroganca nuk do t’ju çojë asgjëkundi. Për të qenë të qartë, arroganca do t’ju çojë deri në vendin ku dikush do t’ju bëjë vërtet të ulni hundën! Nëse pas një interviste merrni në përgjigje negative, gabimi më i madh është që të bëni sikur nuk kishit aspak nevojë për atë vend pune dhe se jeni më lart sesa niveli i pozicionit të punës për të cilin keni aplikuar. Së pari, mos harroni se keni qenë ju ata që keni kërkuar të punësoheni. Së dyti, nëse tregoni mirësjellje dhe mirëkuptim, personi që ju ka intervistuar mund t’ju sugjerojë për një pozicion tjetër qoftë dhe në një kompani të ndryshme. Ndaj mos u nxitoni kurrë t’i gjuani me shqelm një dere të mbyllur, pasi mund t’ju hapet një dritare.
