Me shumë mundësi, Avril Lavigne ishte këngëtarja juaj e preferuar gjatë fëmijërisë apo adoleshencës, teksa këngët si “When your gone” apo “Complicated” dëgjoheshin në çdo cep të botës. Dhe askush nuk arriti ta kuptojë, sesi në vitin 2013, ajo u zhduk pa lënë gjurmë nga tregu muzikor ndërkombëtar.
Pesë vite më pas, Avril Lavigne ka rrëfyer në një letër drithëruese se ka qënë në luftë të vazhdueshme me vdekjen, pasi ishte prekur nga sëmundja “Lyme” (sëmundje e rrezikshme infektive që mund të jetë vdekjeprurëse).
“E kam pranuar vdekjen dhe e kam ndjerë trupin tim duke u shuar. Jam ndjerë sikur po mbytesha, por muzika më bëri të gjej forcën dhe ky publikim i albumit është një mënyrë për të treguar gjithë atë që kam përjetuar”, – shkruan këngëtarja.
Avril jep lajmin e mirë se shumë shpejt do të kemi një album të ri të shkruar nga ajo. Në letrën e drejtuar fansave, ajo tregon se kënga e parë rrëfen të gjitha vuajtjet e saj përgjatë këtyre pesë viteve. Kënga do të vijë për publikun me 19 shtator dhe mban titullin “Head Above Water”.
“Ajo çfarë dua më shumë në jetë është të rikthehem sërish në skenë. Të mbaj kitaren në dorë dhe të vrapoj. Të këndoj me shpirt dhe të udhëtoj aty ku kam fansat e mi. Do bëj gjithçka që është e mundur për ta realizuar këtë. Kam shkruar dhe rregjistruar një album me këngë gjatë kohës që isha e shtrirë në shtrat, e sëmurë. Kjo për mua është një arritje e madhe. Më prisni sepse do të vij” – përfundon letrën këngëtarja Avril Lavigne.
