Pas goditjes nga tërmeti i 26 nëntorit që la pas dëme të mëdha dhe tashmë me pandeminë e koronavirusit që ka bllokuar botën mbarë, turizmi shqiptar po përjeton padyshim periudhën më të errët çka bëhet edhe më e frikshme me mungesën e suportit nga ana e qeverisë.
Megjithatë, ditën e sotme, kryeministri Rama në një lidhje direkte me ndjekësit e tij në Facebook, dëshmoi se ka nisur të mendojë dhe për këtë sektor.
Në njoftimin e zgjerimit të paketës së masave, Rama u shpreh se një prej bizneseve që gjithashtu do të përfshihet në listën e atyre që do të marrin ndihmë nga shteti, janë dhe agjencitë turistike që bëjnë pjesë në biznesin e vogël.
Gjithashtu ai u shpreh se është menduar edhe për punonjësit e restoranteve, pagat e së cilëve gjithashtu do të mbulohen nga shteti. Dhe këtu, nis sërish paqartësia.
Në planin paraprak të masave të njoftuar në mars, kryeministri u shpreh se mënyra e vetme se si do t’i vihej në ndihmë bizneseve të mëdha (ku bëjnë pjesë dhe shumica e restoranteve) do të ishte ofrimi i kredive nga garancia sovrane e qeverisë që siç sqaroi më tej ministri i Financave Arben Ahmetaj, do të ketë një normë interesi 3%.
Pra me masat e reja të njoftuara ditën e sotme, këto biznese do të përjashtohen nga lista e atyre që mund të përfitojnë nga kreditë.
Sidoqoftë, asistimi i bizneseve të cilat janë pjesë e industrisë turistike me kredi që i ndihmojnë vetëm për të paguar punonjësit, është pritur me kritika të mëdha nga ky sektor dhe këtë e konfirmoi për “iconstyle.al” kreu i Shoqatës së Turoperatorëve dhe Agjencive Turistike, z. Rexhep Kasmi.
Z. Kasmi u shpreh se një masë e tillë është absurde në kushtet ku ndodhet industria turistike, ç’ka të bën të mendosh se në planifikimin e paketës, nuk ka pasur asnjë konsultim me këtë kategori që është një prej sektorëve që është goditur më rëndë nga pandemia e COVIS-19.
“Është absurde që në një situatë të tillë, këtyre bizneseve t’u ofrohet një kredi me normë 3%. E aq më tepër për pagat e punonjësve, që në kushte të tilla ku puna ka ndalur prej 4 muajsh, duket të trajtohen nga shteti si të papunë. Kjo që po na propozohet është e padëgjuar! Ajo kredi duhej të ishte 0 % për t’i dhënë frymëmarrje biznesit, por jo për të paguar punonjësit. Të gjitha këto biznese kanë mbyllur dyert dhe po shkurtojnë vendet e punës sepse punë s’do të ketë. Është një armatë e tërë e papunë që po shpërfillet nga shteti dhe nga mënyra se si po menaxhohet kjo situatë, të bën të mendosh se ka mungesë aftësie dhe informacioni.”- tha z. Kasmi për “iconstyle.al”.
Në këtë situatë kaq alarmante për sektorin, sakaq nuk ka ardhur asnjë reagim nga Ministria e Turizmit, që duket se e ka braktisur tërësisht industrinë që ka marrë përsipër të mbulojë.
