Zyrtarisht mund t’i themi mirupafshim tregut të veshjeve të përdorura pranë lagjeve tona pasi sipas një porjekti të ri të Bashkisë së Tiranës, tashmë të gjithë këta tregje do të përfshihen në një treg të vetëm në kryeqytet. Sipas këtij projekti, të gjithë tregtarët e veshjeve të përdorura do të zhvendosen në një treg të madh enkas për këtë punë, në Shkozë, pranë banesave sociale në rrugën “Ali Shefqeti”. Deri më tani, Bashkia ka identifikuar 8 pika të shitjes së veshjeve të përdorura në Tiranë, të cilat pritet të zhvendosen në tregun në fjalë:
-Në rrugën e Kavajës, pranë mbikalimit të Unazës së Re (mbi 200 tregtarë)
-Pranë urës tek Pallati me Shigjeta (30 tregtarë)
-Përballë Farmacisë 10 (50-60 tregtarë)
-Në Laprakë pranë Poliklinikës nr.7 (rreth 50 tregtarë)
-Tek Instituti Bujqësor në Kamëz (rreth 60 tregtarë)
-Pranë Shkollës së Bashkuar (20-50 tregtarë)
-Në rrugën “Vath Koreshi” (20-30 tregtarë)
-Pranë ish-Stacionit të Trenit (200 tregtarë)
Në relacionin e Bashkisë thuhet se këto tregje shpesh sjellin shqetësime tek qytetarët të cilët kanë paraqitur edhe ankesa. Ndërsa Instituti i Shëndetit Publik informon se këto ambiente përmbëjnë një ngarkesë të lartë mikrobale për mjedisin. Ndaj ky projekt i Bashkisë, synon të formalizojë këtë formë tregtie sipas standarteve të lejuara duke ndërtuar një treg me kapacitet 100-120 tregtarë, me një vlerë investimi që arrin 150 mijë dollarë.
