Sikur të mos mjaftonte kriza e madhe ekonomike që ka përfshirë biznesin e vogël në Tiranë, vendimi për t’iu hequr dhe vendin e parkimit, për të ndërtuar korsinë e biçikletave, duket se u dha goditjen e fundit dyqaneve në rrugën “Myslym Shyri”.
Nuk kanë kaluar as 10 ditë që kur Bashkia e Tiranës mori vendimin që vendi i parkimit që kishin dyqanet para dyerve të tyre, të zihej nga korsia e biçikletave, dhe pasojat janë trishtuese.
Në disa foto të publikuara nga “Dosja.al” shihet se mbi 15 biznese nga kryqësimi i Drejtorisë së Policisë deri në fund të rrugës në pikëtakimin me rrugën “Muhamed Gjollesha”, kanë falimentuar.
“Jepet me qira”, janë tabelat që shihen në dyert e mbyllura të këtyre bizneseve të vogla që nuk e përballuan dot krizën ekonomike nga pandemia e koronavirusit.
Dhe në vend të një dore mbështetëse nga autoritetet për ta kaluar sa më lehtë këtë situatë të vështirë, atyre iu hoq edhe një vend parkimi që kishin para, duke mos i lënë mundësi për të ngritur kokën pas goditjes së madhe këto 2 muajt e fundit.
Kështu, shumë biznese që u hapën pas bllokimit, në rrugën “Myslym Shyri” e patën të vështirë në këto kushte, të siguronin parkim për punonjësit, furnitorët, apo dhe klientët.
E kuptojmë që në këtë periudhë që mungon edhe transporti publik, korsitë e biçikletave mund të jenë një nevojë e madhe, por jo duke marrë një vendim të tillë në dukje të paplanifikuar, që ka rënë si një barrë e madhe mbi kurrizin e këtyre bizneseve.
Pak ditë më parë këto biznese kanë dalë dhe në protestë, ku kanë kundërshtuar vendimin e bashkisë për heqjen e vendparkimit dhe shndërrimin e tij në korsi biçikletash, që me sa shohim, s’po shfrytëzohet as nga qytetarët. Në videon e mëposhte të realizuar nga iconstyle.al, njerëzit vijojnë të ecin me biçikletë në mes të rrugës.
“Iconstyle.al” e ka theksuar prej kohësh se biznesit po i bëhet një dëm i jashtëzakonshëm nga politikat e gabuara që janë ndjekur në vendin tonë. Vijimi i izolimit për një kohë tejet të gjatë apo detyrimi për të vijuar pagesat e taksave në mënyrë të rregullt ndërkohë që aktiviteti ekonomik për biznese të shumta ishte bllokuar, detyroi bizneset të mbanin dyert mbyllur duke shkaktuar edhe falimentinim e disa prej tyre (lexo këtu), për të mos folur për punonjësit, të cilët kanë humbur vendin e punës.
Një fenomen tjetër shqetësues po del në dritë: ai i frikës për të folur (lexo këtu). Përveç organizatave apo shoqatave si ajo e Turizmit apo ajo e Bareve dhe Restoranteve që kanë dalë në deklarata të herë pas hershme për të negociuar kushtet që u janë vendosur, sipërmarrësit si individë i druhen në mënyrë të frikshme bërjes publike të identiteteve të tyre apo bizneseve që drejtojnë, kur u kërkohet që t’i japin zë problemeve të tyre.
