Nëse kemi shkuar në takime të panumërta me njerëz të papërshtatshëm dhe ndihemi sikur nuk do të gjejmë kurrë dashurinë e vërtetë, artikulli i Julie Orlov, psikoterapiste dhe autore e librit “Rruga drejt dashurisë: Krijo intimitet dhe transformo marrëdhëniet e tua përmes vetë-zbulimit”, vjen për të na dhënë shpresë.
Siç na siguron ajo, gjithnjë e më shumë njerëz janë beqarë (ose të divorcuar, ndoshta edhe të ve) pas të pesëdhjetave dhe janë në kërkim të dashurisë, sipas statistikave. Në fakt, në moshat më të mëdha, takimet janë më selektive, më të ndërgjegjshme dhe kanë më shumë gjasa të bëhen fillimi i një lidhjeje të përjetshme, siç na siguron eksperti.
Në fakt, Orlov sugjeron katër arsye pse takimi pas pesëdhjetave premton më shumë:
-Kemi mjaft përvoja jetësore për të dalluar të rëndësishmen nga e parëndësishme. Ne e dimë se kush jemi dhe e kuptojmë më lehtë se me kë kemi përballë.
-Kemi kuptuar gabimet që kemi bërë në marrëdhëniet e mëparshme. Kjo njohuri na lejon t’i shmangim ato në të ardhmen dhe të ndërtojmë një lidhje më kuptimplote dhe më pak të tensionuar.
-Kemi më shumë liri për të shijuar jetën. Nëse ka fëmijë, ata ndoshta janë larguar nga shtëpia ose, të paktën, po jetojnë jetën e tyre. Nëse vazhdojmë karrierën, edhe ajo ndjek rrugën e vet. Pas pesëdhjetë, ne kemi hapësirën për të shijuar gëzimet e jetës me më pak ankthe dhe angazhime – në fund të fundit, ne tani e dimë mirë se sa e çmuar është koha.
-Ne jemi më mendjehapur në marrëdhëniet tona romantike. Nuk shqetësohemi për një shtatzëni të mundshme dhe as për imazhin e trupit tonë. E kemi pranuar (me pak fat) veten ashtu siç jemi dhe nuk na shqetëson të dukemi pa të meta në pasqyrë.
