Udhëtarët nervozë në aeroportin e Shkupit, të cilët janë në ankth për të udhëtuar me avion, kanë në sallën e nisjeve të disponueshme Dino-n, retrieverin për t’i ndihmuar ata të pushojnë.
I njohur më mirë me pseudonimin “Zen Dog”, Dino katër vjeçar viziton rregullisht Aeroportin e Shkupit për të “siguruar një përvojë udhëtimi më relaksuese dhe të këndshme,” sipas menaxhmentit të aeroportit.
“Ne e dimë se udhëtimi ajror mund të jetë stresues,”-thotë Maja Bayalska Georgievska, drejtoreshë e komunikimit e kompanisë administruese, e cila drejton Aeroportin e Shkupit.
Pra, Dino kalon nëpër portat e imbarkimit të aeroportit dhe lejon pasagjerët ta përkëdhelin ose të bëjnë selfie me të përpara se të hipin në aeroplanin e tyre.
“Edhe kur udhëtarët nuk i afrohen, ai përpiqet të ndërveprojë me ta” shpjegon Vesna Kiskovska, trajnerja e tij. “Ai është një retriever i artë, një racë qensh që i pëlqen të bëjë miq”-shton ajo.
Që nga nëntori, ai tashmë e ka çuar Dinon në aeroport dhjetëra herë, zakonisht në orët më të ngarkuara. Çdo herë reagimet janë “shumë pozitive”. Programi është i pari i këtij lloji në rajon, sipas kompanisë administruese.
Aerofobia, ose frika e tepruar ose irracionale që një person përjeton në lidhje me fluturimin, është e zakonshme në mesin e udhëtarëve, sipas studimeve të ndryshme. Qentë, megjithatë, duket se kanë aftësinë unike për të ndihmuar në luftimin e stresit te njerëzit.
Sipas një studimi të vitit 2021 të botuar në Journal of Clinical Medicine,”qentë e shërbimit mund t’i bëjnë pacientët me çrregullime ankthi të ndihen më të sigurt, të lehtësojnë aktivitetin shoqëror dhe të reduktojnë ndjenjat e izolimit dhe vetmisë“.
