Viti i ri pritet të jetë viti i artit për Shqipërinë! Pas Koncertit të Vjenës në Tiranë, muaji janari do të sjellë edhe të parën ekspozitë në Shqipëri të një koleksioni kryeveprash origjinale në pikturë.
Pikturat e Novecentos, kryeveprat e artit italian të vitit 1900 do të ekspozohen edhe për publikun shqiptar. Në një postim në rrjetin social “Facebook”, kryeministri Edi Rama dha lajmin e mirë për të gjithë artdashësit se pas Koncertit të Vjenës në Tiranë më 2 janar, në Shqipëri do të vijë një koleksion veprash origjinale në pikturë. Ato do të ekspozohen më datë 16 janar në Galerinë Kombëtare të Arteve.
“Për herë të parë jo vetëm artistët e rinj apo edukatorët e artit, po edhe nxënësit, studentët e mbarë publiku artdashës, do të mund të marrin shijen unikale të telajove origjinale të mjeshtrave të pikturës europiane”, thuhet në postimin e Ramës.
Kryeministri gjithashtu premtoi që kjo gjë do të bëhet traditë, ku çdo vit do të sjellë kryevepra botërore dhe është shprehur me shumë shpresë se viti 2018 do të sjellë në Shqipëri koleksion të veprave origjinale të Muzeut Picasso në Paris.
“Kjo rrugë e re eksperiencash të rralla artistike për publikun shqiptar, të cilën njësoj si Koncertin e Vjenës në Tiranë, duam ta kthejmë në traditë, vit pas viti, nis me kryeveprat e pikturës italiane të Novecentos dhe kam shumë shpresë se do të vazhdojë në vitin 2018 me një koleksion veprash origjinale të Muzeut Picasso në Paris”, vazhdon më tej postimi i tij.
Burimi: Facebook
