Në 110 vjetorin e pavarësisë së Shqipërisë, motori i kërkimit Google është ‘veshur’ kuq e zi.
Pas mesnate, në faqen e parë të Google është vendosur flamuri kuq e zi në një sfond blu mbi emrin e motorit të kërkimit.
Sot Shqipëria feston 110-vjetorin e shpalljes së Pavarësisë dhe nisjen e rrugëtimit si një shtet më vete.
28 Nëntori festohet jo vetëm në Shqipëri, por edhe në Kosovë, Maqedoni, Mal të Zi dhe troje të tjera shqiptare.
Kujtojmë që edhe Dua Lipa ndodhet në kryeqytet me rastin e festave të nëntorit. Ajo do të mbajë edhe një koncert falas për të gjithë fansat e saj.
Shqiptarja me famë botërore, e cila do të përmbyllë turneun e saj “Future Nostalgia” në tokën shqiptare, ka bërë me dije se koncerti do të mbahet në sheshin “Skënderbej” ditën e Flamurit.
Me anë të një postimi në faqen e “Sunny Hill Festival”, Dua u shpreh:
“Emocioni është i madh për spektaklin “Future Nostalgia”, i cili do të mbahet në Tiranë, Shqipëri, në sheshin ‘Skënderbej’ më 28 nëntor 2022. Është nder të festosh një ngjarje kaq të rëndësishme – 110 vjetorin e Pavarësisë.”
Nga dje, ylli i muzikës botërore, Dua Lipa zotëron edhe nënshtetësinë shqiptare. Këngëtarja shqiptare u betua si shtetasja më e re shqiptare para kryetarit të Bashkisë së Tiranës, Erion Veliaj. “Faleminderit shumë! Është një gëzim i papërshkrueshëm dhe një nder shumë i madh.
Jam shumë e emocionuar nga mikpritja, dashuria, mbështetja. Mezi pres koncertin e nesërm“, tha Dua.
Gjithashtu ajo ka bërë edhe një postim në Instagram, ku shprehet “krenare.”
