Të enjten në Parlament pritet të votohen disa ndryshime në kodin penal, përsa i përket situatës së krijuar nga COVID-19.
Në mbledhjen e sotme të Komisionit të Ligjeve u vendos që kush thyen karantinën të dënohet me gjobë deri në 3 vite burg.
Më herët ishte vetëm opsioni i 5 viteve burg pa gjobë.
Ndërsa për ata që përhapin sëmundjen dënimi do të jetë 5 vite, nga 10 që ishte më parë.
Në rastet kur përhapja e sëmundjes shkakton vdekjen e njeriut, ndëshkimi është 5 deri në 15 vite burg.
Projektligji që pritet të votohet
KREU VIII,
SEKSIONI III
VEPRA PENALE KUNDËR RENDIT DHE SIGURISË PUBLIKE
Neni X
Moszbatimi i masave të autoriteteve shtetërore gjatë epidemisë ose gjendjes së fatkeqësisë natyrore
Moszbatimi ose kryerja e veprimeve në kundërshtim me urdhërat ose vendimet e nxjerra nga organet shtetërore gjatë epidemisë ose gjendjes së fatkeqësisë natyrore,kur është dhënë më parë masë administrative, përbëjnë kundërvajtje penale dhe dënohet me gjobë ose me burgim deri në një vit.
Moszbatimi i urdhrit të dhënë nga organet kompetente për karantinimin ose izolimin e detyrueshëm apo shkelja e rregullave të karantinës ose izolimit nga personi mbartës ose jo i sëmundjes infektive, dënohet me gjobë ose me burgim deri në tre vjet.
Neni XY
Përhapja e sëmundjeve infektive
Moszbatimi apo kryerja e veprimeve në kundërshtim me urdhrat apo vendimet e organeve shtetërore që kanë të bëjnë me parandalimin apo luftimin e sëmundjeve infektive, kur ka shkaktuar përhapjen e sëmundjes infektive me rrezikshmëri të lartë për shëndetin te njerëzit, dënohet me burgim deri në pesë vjet.
Po kjo vepër, kur ka shkaktuar pasoja të rënda për shëndetin ose jetën e njerëzve dënohet me burgim nga tre deri në dhjetë vjet. Kur kjo vepër, ka shkaktuar vdekjen e një ose më shumë personave, dënohet me burgim nga pesë deri në pesëmbëdhjetë vjet. /gazetareforma
