Inspektorati Kombëtar i Mbrojtjes së Territorit ka nisur aksionin për prishjen e 10 ndërtesave që janë pa leje dhe në tokë shtetërore në zonën e Jalës. Prishja e parë e një ndërtese, u prit me tensione të shumta dhe konfrontime të banorëve me forcat e policisë. Banorët e zonës janë ngritur në këmbë, duke kundërshtuar shembjen e banesave. Ata pretendojnë se janë me dokumenta të rregullta dhe se çështjen e kanë apeluar edhe në gjykatë dhe janë ende në proces.
“Jemi me dokumente të rregullta dhe duan të na nxjerrin me dhunë nga prona. Kemi bërë mbivendosje mbi pronën tonë dhe çështjen e kemi apeluar. Tani presim vendimin e gjykatës. Nuk kemi marrë asnjë njoftim zyrtar për aksionin, por na kanë njoftuar vetëm me gojë”- shprehen banorët.
Në videon e publikuar, shfaqet një banore, e cila ka refuzuar të zbresë nga prona, por më pas është nxjerrë me dhunë nga policia. Aktualisht nuk ka pushues në zonë dhe IKMT ka nisur shembjen e ndërtesës së parë. Sakaq, ky institucion thekson se aksioni është paralajmëruar më parë dhe banorët kanë qënë në dijeni.
Në zonë kanë zbarkuar forca të shumta të policisë vendore të Vlorës, RENEA dhe FNSH.
