Prej disa ditësh tashmë, Tirana dhe qytete të tjera po “ziejnë”, pasi janë përballur me protesta të dhunshme ndaj Policisë së Shtetit dhe ndaj pronës publike e private.
Këto “kryengritje”, filluan spontanisht pas vrasjes së 25-vjeçarit Klodian Rasha nga një efektiv policie orët e para të mëngjesit së datës 8 dhjetor në Tiranë. Ironikisht vrasja e të riut nga efektivi i Policisë së Shteti, ndodhi në Ditën e Rinisë.
Protestat për vrasjen e të riut Rasha nxorrën në pah edhe hipokrizinë e VIP-ave shqiptarë, intelektualëve zë mekur, anëtarëve të “shoqërisë civile”, etj.
Ku janë postimet për Klodianin nga mediat? Ku janë postimet për Klodianin nga të famshmit?
U ngritën të gjithë për pemën dhe për vandalizmat. Nëse s’ka parti politike që organizojnë tubimet, do të ketë vandalizma pasi nuk ka organizim. Qytetarët apo të rinjtë shpesh nuk dijnë as se si të kërkojnë leje në organet kompetente për tubime.
Turp për këta “artistë” që marrin rroga në këshille bashkiake e nëpër borde. Turp për këto media që janë të financuara me lekët e popullit, abuzim me fondet publike, kurse këto të opozitës me fondet e legjislatures kaluar, për këtë arsye i kanë fuqizuar oligarkët e vetë, përveç këtyre që kanë ngrënë buke edhe me PS-në, ka dhe nga ata që nuk kanë marrë punë e financojnë akoma media politikisht të krijuari si Syri Tv etj.
Shpresojmë të mos “infiltrohet” Partia Demokratike në protestë siç ndodhi në protestat për traun e “Kastratit” dhe Salillarit”, oligarkëve të qeverisë, apo si te protestat 1 vjeçare në Astir. Sepse nëse ndodh kështu, atëherë do t’i japë të drejtë qeverisë që të thotë se protestat e ditëve të fundit janë të nxitura politiksht, duke zbehur kështu kauzën mëse të drejtë të saj.
Mediat propagandistike kërkojnë që të instalojnë në subkoshiencën e opinionit publik se protestat kundër vrasjes së të riut Rasha janë kryekëput politike por e vërteta është që kjo lëvizje shpërtheu spontanisht si revoltë ndaj padrejtësive, ku supozohet që struktura e Policisë së Shtetit që paguhet nga taksapaguesit shqiptarë duhet të të mbrojë, pikërisht ajo të vret në derën e shtëpisë!
Kreu i Partisë Demokratike, Lulzim Basha, është personi i fundit që duhet të flasë për këto padrejtësi, pasi ai vetë si ministër i Brendshëm vendosi një precedent fatal, ku 4 qytetarë të pafajshëm u vranë nga dora e shtetit në mes të ditës për diell në protestën e dhunshme të 21 janarit 2011.
Nëqoftëse strukturat dhe mercenarët politik infiltrohen në këtë protestë, atëherë edhe kjo revoltë e drejtë e të rinjve që i kanë vrarë bashkëmoshatarin e tyre, do të toksikohet dhe të zbehet.
Ne si shoqëri, si qytetarë të këtij vendi, kemi detyrim qytetar që të kërkojmë drejtësi për Klodianin, pa pyetur për dëmet materiale që shkatërrojmë, pasi para jetës dhe dinjitetit tonë nuk ka asgjë më të shtrenjtë. Jeta është vija e kuqe për çdo pushtet!
I bëjmë thirrje strukturave partiake, Partisë Demokratike dhe LSI-së, që të mos influencojnë dhe të prishin një prej protestave më të drejta të shoqërisë shqiptare në vitet e fundit ashtu siç kanë bërë gjithmonë, pasi kjo ndërhyrje është në dëm të shqiptarëve dhe mbi të gjitha do t’i kthehet në boomerang këtyre partive.
Kujtojmë se precedentët negative të këtyre ndërhyrjeve politike në tubimet e masave qytetare janë skalitur në memorien kolektive të këtyre 30 viteve demokraci.
Protestat e Lëvizjes së Dhjetorit 1990, protestat e vitit të mbrapshtë 1997, protestat duke përdorur vrasjen e Azem Hajdarit, protestat e Lëvizjes Mjaft me moton Nano Ik, protesta e 21 Janarit 2011 ku mbetën të vrarë 4 protestues, protestat 1-vjeçare në Astir, protestat e PD dhe LSI-së pas djegies së mandateve në Kuvend, janë shembujt e kaluar se ndërhyrjet politike janë fatkrqësia kombëtare e këtij vendi. Ku infiltrohet politika kauza humbet dhe shuhet.
Përdorimi i kauzave të shenjta të shoqërisë për vota dhe pushtet politik, ndjellin akoma më shumë urrejtje për strukturat e vjetra dhe për “mamuthët” e politikës shqiptare në këto 30-vite tranzicion të demokracisë.
Fundin dhe gjyqin e këtyre “ujqërve të vjetër” të politikës do t’ia bëjë vetë populli shqiptar!
