Është ndarë nga jeta ditën e sotme (13 shator), mjeshtri i violinës Hetem Qerimaj.
Lajmin e ka bërë të ditur djali i tij, Fatosi, nëpërmjet një postimi në rrjetet sociale.
“Të nderuar miq, me dhimbje ju njoftoj ndarjen nga kjo jetë të babit tim të dashur Hetem Qerimaj. Zoti e pranoftë në parajsë”- shkruan ai.
Ai u nda nga jeta në moshën 88-vjeçare.
Disa vite më më parë, në një intervistë në media, mjeshtri i violinës Hetem Qerimaj shprehej se interpretonte me këtë instrument prej 4 dekadash.
Me rastin e 85-vjetorit të Hetem Qerimajt, u mbajt dhe koncerti me titullin “Harku i Triumfit të Qerimajve” i cili solli përvojën e gjatë të patriarkut të familjes, pasuar deri te muzikanti më i ri i saj. Kompozitori dhe klarinetisti Fatos Qerimaj, i biri i mjeshtrit të violinës Hetem Qerimaj u shpreh se ky koncert nuk ishte vetëm festimi i një ditëlindjeje, por edhe promovimi i artistëve të një familjeje të madhe muzikantësh.
“85-vjetorit të babait i kushtuam një vëmendje shumë të rëndësishme, për ta bërë atë të lumtur në këtë mbrëmje, triumfale të karrierës. Prandaj edhe titulli ‘Harku i Triumfit’ është një simbolikë e karrierës së tij artistike. Tanimë, familja Qerimaj numëron 9 artistë shumë të mirë, që janë në një aktivitet gjatë gjithë kohës. Janë tre breza që e kanë trashëguar instrumentin e violinës”, ka deklaruar ai më 2019.
