Një provë e zakonshme e SpaceX në Teksas përfundoi me shpërthim spektakolar të një prej anijeve më ambicioze të Elon Musk. Starship 36, gjiganti teknologjik që pritet të shërbejë si mjet udhëtimi drejt Hënës dhe Marsit, shpërtheu papritur të mërkurën mbrëma, vetëm pak çaste para një prove statike në qendrën Starbase.
Shpërthimi ndodhi rreth orës 23:00 me orën lokale dhe prishi planet për fluturimin e 10-të testues të serisë Starship. Sipas vëzhguesve, incidenti ndodhi rreth 30 minuta pasi kishte nisur mbushja me lëndë shtytëse, por pa arritur të nisin motorët, që zakonisht aktivizohen gjatë testit statik, pa e lëvizur anijen nga vendi.
Fatmirësisht, nuk pati asnjë të lënduar, dhe zona përreth ishte e izoluar në kohë. SpaceX reagoi menjëherë, duke siguruar se personeli është në gjendje të mirë dhe se nuk ka rreziqe për banorët pranë zonës Massey, ku ndodhi shpërthimi.
