Nëse po kërkoni diçka për t’u argëtuar tani që daljet jashtë duken të frikshme me virusin COVID-19 nëpër këmbë, atëherë ju duhet një serial që t’ju mbërthejë pas ekranit dhe t’ju bëjë të harroni çfarë po ndodh përreth.
Seriali i javës “The Blacklist” (Lista e zezë) për të cilin do të flasim sot hyn te ajo kategori “Old but gold”, pasi është publikuar fillimisht në vitin 2013 dhe ende vijon sot e kësaj dite të transmetohet me një sezon të shtatë.
Drama dhe krimi janë dy zhanre që kanë mbingopur kinematografinë amerikane, por ne po ju japim sot disa arsye përse “The Blacklist” duhet ndjekur!
Si nis historia!
E gjithë historia vërtitet rreth një personazhi, Raymond ‘Red’ Reddington (James Spader, tre herë fitues i çmimit “Emmy”), një kriminel shumë i kërkuar, i cili është vetëdorëzuar në FBI. Në këmbim të lirisë së tij, ai ndan me ta emrat e kriminelëve më të rrezikshëm në botë – në të ashtuquajturin “listën e zezë”.
Por Red ka një kusht primar. Ai insiston që efektivja Elizabeth (Megan Boone),të bashkëpunojë me të dhe audienca këtu tërhiqet shumë pas misterit, ndërsa efektivja përpiqet të zbulojë të vërtetën për lidhjen e saj me këtë kriminel dhe motivet e tij të vërteta.
Misteret s’kanë fund!
“The Blacklist” është shumë më tepër se kaq, pasi misteret e ndryshme ndërtohen gjatë të gjithë serialit. Çdo ditë përballemi me kriminelë të ndryshëm dhe dilema. Për shembull, pse Red dëshiron të punojë vetëm me Elizabeth? Cila është lidhja midis tyre që ajo nuk e di? Dhe pse Red dëshiron të ndihmojë FBI-në në radhë të parë?
Gjithçka vërtitet rreth marrëdhënies së Red me Elizabeth, e cila nga ana tjetër është e martuar me një profesor që quhet Tom. Red arrin t’i hedhë benzinë marrëdhënies së saj me Tom, kur i rrëfen që ai nuk është personi që duket dhe i kërkon të bëjë kujdes!
Parimi është: Kurrë mos i bëso një krimineli, deri sa je e detyruar ta bësh! Por a duhet t’i besosh një krimineli më shumë se personit me të cilin ndan një shtrat?
Vetë Red shprehet në një nga seritë se mund të drejtosh dikë tek e vërteta, por jo ta bësh atë të besojë!
Qershia mbi tortë është vetë Red!
Raymond ‘Red’ Reddington mbetet një shejtan brenda dhe jashtë edhe kur është në anën e ligjit.
Ai është një mashtrues, gënjeshtar, hajdut dhe vrasës – por është e pamundur të mos e pëlqesh me rolin e tij simpatik dhe karizmatik. Suksesi i personazhit varet nga mjeshtëria e aktorit James Spader, i cili do t’ju mbajë të gozhduar episod pas episodi.
Red është një nga personazhet më të mirë të televizionit aq sa mund të të detyrojë ta pëlqesh edhe kur bën keq!
Ai të bën të harrosh sensin e moralit, edhe kur bën gjëra të tmerrshme (si vret njerëz, gënjen, mashtron, manipulon gjithçka). Por ajo që e bën më interesante figurën e tij është besnikëria që ka ndaj Elizabeth, (ose ashtu siç e thërret ai Lizzie), fakti që mund të bëjë gjithçka që ajo të mos lëndohet.
Red i shpëton shumë herë jetën asaj, duke vënë në rrezik të tijën, dhe marrëdhënia mes tyre e bën akoma më interesante dilemën: Çfarë i lidh ata në të vërtetë?!
Askush nuk është siç duket!
Lizzie është gjithashtu një personazh mjaft interesant për t’u ndjekur. Ajo është një femër që synon të zgjerojë familjen e saj duke adoptuar një fëmijë edhe pse nuk është shumë e sigurt nëse duhet ta bëjë këtë, pasi mëson disa të vërteta. Ka një jetë në shtëpi, ambicie në karrierë, por jeta e saj ndryshon rrënjësisht kur njihet me Red.
Megjithatë askush në këtë serial nuk është ai që duket madje as efektivja jonë e cila ka një të shkuar të dhimbshme dhe një shenjë djegieje në krah! Kush është Lizzie, në të vërtetë? Çfarë ndodhi me familjen e saj? Këtë e dimë, por po jua lëmë juve ta zbuloni!
Seriali bën disa zbulime të habitshme që edhe mund të hamendësohen gjatë rrugës!
