Drejtori i Urgjencës Kombëtare, Skënder Brataj, e ka mposhtur virusin vdekjeprurës Covid-19.
Po ashtu është shëruar edhe kolegu i tij, mjeku Andi Koraqi.
Brataj dhe Koraqi kanë rezultuar negativë në testin e fundit, ndërsa Brataj ka treguar se është gati të kthehet në detyrë.
Në një lidhje me Skype në emisionin “Opinion”, Brataj u shpreh se tashmë është në punë nga shtëpia, por po përgatitet të rikthehet në terren.
Sipas shefit të Urgjencës, ai mund të rikthehet në punë këto dy ditë, ose në javën tjetër.
“Ose këto dy ditë, ose nga java tjetër do të dal nga shtëpia dhe të rikthehem në punë. Unë kam 24 ditë në izolim.”- u shpreh Brataj gjatë lidhjes me Skype.
Gjithashtu, Brataj tregoi se fillimisht kolegët i kishin fshehur skanerin, që ai të mos mësonte se ishte infektuar me Covid-19.
“Nga data 21 mars deri sot. Problemi me koronavirusin është që kur kalon ditët e para. Ndjeja lodhjen dhe problemet. 4-5 ditët e para kisha temperaturë, diarre. E dija çfarë më priste. Bëra një skaner ditën e 5-të. Por ma bënë me hile dhe nuk ma treguan. Në skanerin e parë kisha probleme pulmonare. Tek i fundit ishin reduktuar fare. Tashmë janë shumë mirë. Por, duhet shumë aktivitet fizik. Unë kam bërë 10 kilometra ecje çdo ditë brenda shtëpisë.”-tha mjeku.
