Pasi ministrja e Shëndetësisë bëri me dije se do të ketë një shtyrje të masave të sigurisë pa afat deri në zhdukjen e epidemisë së koronavirusit, kryeministri Edi Rama e ka zbutur disi situatën me një lajm të mirë.
Në një njoftim për shtypin pak më parë ai u shpreh se nëse bilanci i të infektuarve në vend do të qëndrojë stabël, atëherë mund të ketë disa lehtësime të lëvizjes.
Nëse numrat deri të dielën do të jenë të qëndueshme atëherë do të ketë lehtësira për qytetarët, por me pikatore, sipas kreut të qeverisë. Rama bëri thirrje të mos entuziasmohemi para kohe, por të bëjmë durim:
“Ne po detajojmë një plan të lehtësimit të masave që do të hyjë menjëherë në zbatim sapo të shohim filliminin e rënies së kurbës së të infektuarve. Deri në mes të prillit ne do të mësojmë dhe do të kuptojmë shumë sa thellë është shtrirë ky armik i padukshëm mes nesh.
Po studiojmë disa lehtësime të lëvizjes, që t’i kemi gati, me ndihmën e Zotit, duke filluar me pikatore nga java e ardhshme, po që se numrat deri të dielën do të na e lejojnë ta marrim në konsideratë përdorimin e pikatores.
Prisnim një kërcim të numrave në javën që lamë pas, mirëpo nuk ndodhi, çka na bën disi më optimistë se sa ishim në nisje, por kjo nuk do të thotë asgjë sot për sot. Prandaj vigjilencë dhe rezistencë, pa u lodhur e pa u mërzitur, sado e vështirë është kjo por me forcë e me besim të madh. Fati i kësaj lufte, nuk varet vetëm nga armiku i padukshëm, po edhe nga rezistenca jonë, durimi e motivimi ynë, çdo ditë, pa menduar po nesër ça do bëhet! Duhet të jetojmë me ditën, jo më javën e as me muajin, sepse ndryshe nuk e fitojmë dot këtë luftë”.
/Iconstyle.al
