Mjeku Pëllumb Pipero ishte i ftuar në rubrikën “Opinion” në “News24”, duke dhënë edhe njëherë disa këshilla lidhur me situatën e Koronavirusit në vend.
Gjendja është mëse serioze, pasi numërohen 59 të infektuar dhe 2 viktima, ndërsa shifrat pritet të rriten në vijim.
Pipero shprehet se epidemia do të largohet në 4 muaj, megjithatë kjo sërish mbetet një hipotezë.
Mjeku beson se Covid-19 mund të rikthehet edhe pas 1 apo 2 vitesh, ndaj i fton të gjithë të bëjnë sa më shumë kujdes.
“Faleminderit të gjithë qytetarëve shqiptarë që na kanë mirëkuptuar dhe kam një qortim shumë të madh për ata që nuk na kanë dëgjuar dhe nuk po na dëgjojnë.
Shumë e rëndësishme ta kuptojnë sot, nesër është vonë. Nipërit dhe mbesat nuk do të gëzojnë dot gjyshërit. Nëse duan të gëzojnë nipërit dhe mbesat atëherë të respektojnë këshillat.
Kam të njëjtat informacione dhe në Itali, nuk i besojnë atyre që shohin në TV. Nuk është lojë, është luftë e vërtetë. Pandemi e cila ka shumë të panjohura. Askush nuk e kupton dot. Ka shumë të panjohura, kudo në Europë dhe në botë është vetëm fillimi.
Kur më thanë që doli rasti i fundit në Kinë nga spitali thashë duhet kohë që të shihet.
Unë them në 4 muaj do të kalojë. Ne ende nuk e dimë ç’do të ndodhë përtej kësaj pandemie. Ky virus mund të rikthehet prap pas një viti apo pas dy vitesh me ndryshime, me mutacione.
Ende nuk kemi asnjë vaksinë apo mjekim antiviral. Sa kohë nuk kemi këto jemi para të panjohurve. Vaksina dhe medikamenti, e vetmja armë që kemi është kujdesi. Kujdesi është më i rëndësishmi. E para nuk sëmuren ata, e dyta nuk sëmuren të tjerët, e treta ka më pak numra të atyre që na vijnë në spital. Shtimi i rasteve në Itali tejkalon çdo masë, kapacitet të mundshëm mjekësor. Ky eklipson mjekësinë dhe ekonominë.
Ju lutem mes jush, nëse qëndrojnë në shtëpi atëhere do e kalojnë mirë këtë situatë. Por nëse jo, atëhere përmasat mund të jenë më të mëdha se në Itali pasi ne nuk jemi 60 milion. Do ishte mirë të ishte bërë dje por më mirë të bëhet sot. Nga sot e tutje them më mirë sot dhe jemi në kohë për të reduktuar numrat.
Unë besoj që këto masa kanë brenda dhe distancën. Moslejimin e grumbullimit, pra të mos afrohen me njëri-tjetrin.”- është shprehur mjeku.
