Mjeku imazherist i QSUT, Renato Osmënaj, është shprehur në një intervistë për “News24” se Covid-19 ka hyrë në Shqipëri që në muajin shkurt.
Pavarësisht se rasti i parë u konfirmua më vonë, Osmënaj është i bindur se virusi u shfaq më herët tek ne.
Gjatë intervistës së tij, ai tregon se i janë raportuar raste vdekjesh në spitalet private që më 25 shkurt, mirëpo askush nuk e ka ditur arsyen e vërtetë të vdekjes së pacientëve.
“Unë besoj se Covid-19 në Shqipëri ka hyrë në fund të shkurtit. Mua më është raportuar se ka pasur vdekje në spitale private më 25 shkurt, e mjekët nuk e kanë kuptuar nga se ka ndërruar jetë.”- është shprehur mjeku.
Kjo hipotezë lidhet ngushtë me faktin që Covid-19 u përhap menjëherë me gripin sezonal dhe simptomat e tyre ishin tepër të ngjashme.
Madje, shumë persona nuk e kuptuan si u infektuan, apo nëse kishin virus.
Sipas raportimit të mjekëve, ka pasur plot raste me kollë dhe temperaturë të lartë, që nuk qetësoheshin prej ditësh.
Mirëpo, për shkak të përhapjes menjëherë me gripin sezonal, Covid-19 ishte i vështirë të dallohej dhe u desh pak kohë për këtë.
Intensifikimi i tij nisi në fillim të muajit mars dhe shifrat vijuan të rriteshin dita-ditës, ndërkohë që populli nisi të ndërgjegjësohej për virusin.
Sipas përditësimit të ditës së sotme, deri tani Shqipëria numëron 548 të infektuar dhe 26 jetë të humbura.
Në total, numri i të shëruarve ka shkuar në 302, ndërsa kurba luhatet dita ditës.
Kryeministri Rama ka bërë të ditur se nëse kurba do të vijë në zbritje, të gjithë do të mund t’i kthehemi normalitetit.
Shpërndarja gjeografike e rasteve pozitive, është si vijon:
– Tiranë 246 raste
– Durrës 42 raste
– Lushnje 6 raste
– Elbasan 16 raste
– Fier 36 raste
– Kavajë 9 raste
– Rrogozhinë 4 raste
– Korçë 19 raste
– Vlorë 5 raste
– Shkodër 94 raste
– Lezhë 14 raste
– Berat 2 rast
– Has 13 raste
– Krujë 11 raste
-Tropojë 4 raste
– Pukë 5 raste
– Mirditë 3 raste
– Kukës 11 rast
-Mallakastër 1 rast
– Kurbin 7 raste
