Në ditët e nxehta të verës zakonisht pijet e ndryshme në lokale i shoqërojmë me akull. Mirëpo kohët e fundit po përflitet në media gjithmonë e më shumë se pikërisht akulli që konsumojmë në lokale është shkaktar i një sëmundje të rëndë infektive.
Mjeku Pëllumb Pipero ngre alarmin se pranë pavionit të sëmundjeve infektive në Tiranë janë paraqitur 3 raste me hepatit A, ku shkak kryesor ka qenë akulli pasi ai prodhohet me ujin e rrjetit, i cili ka rezultuar se është i pasur me baktere të shumta.
“Nga eksperienca klinike veçanërisht me hepatite A në mosha të rritur personalisht kam patur 2-3 raste të tilla. Indirekt e kam akuzuar akullin si burim të mundshëm apo rrugë të mundshme të transmetimit të mjaft sëmundjeve infektive me natyrë virusale apo bakterore. Themi kështu sepse nuk kam informacion të saktë që akulli prodhohet në kushte opimale. Së dyti, jam i sigurt që prodhohet me ujin e rrjetit që jo gjithmonë është i sigurtë, apo jo gjithmonë është i pa ndotur”, është shprehur Pëllumb Pipero, Shef i Shërbimit Infektiv, QSUT.
Sipas mjekut Pipero akulli është shkaktar i shumë sëmundjeve me natyrë bakteriale.
“Po kështu na rezulton se uji i pijshëm apo akulli që prodhohet nga uji i pijshëm i pasigurt, neve kemi mjaft raste të tjera që shkakton sëmundje të tilla si gastrointerite, intoksikacionet etj.”, përfundon mjeku Pipero.
Burimi: Top Channel
