Prej javësh është ngritur alarmi se në vendin tonë situata nga Covid-19 është vërtetë e rëndë dhe e gjitha kjo arriti kulmin ditën e sotme kur u shënua rekordi jo vetëm për rastet e reja por edhe për viktimat brenda 24 orëve. Ministria e Shëndetësisë informoi mëngjesin e sotëm se janë identifikuar 93 raste të reja dhe janë regjistruar 4 të vdekur, duke e çuar numrin e viktimave në total në 89 dhe të të infektuarve në 3371.
Është e logjikshme që në këtë situatë, ndonëse nuk jemi mbyllur dhe vijojmë jetën normalisht, të tregohemi të kujdesshëm dhe të respektojmë rregullat e distancimit social dhe të vendosim maska në vendet publike. Madje qeveria ka ndaluar edhe tubimet, për shkak se sipas saj grumbullimi i njerëzve në një vend bën të mundur shpërthimin e virusit, që do të çonte në vatra të reja infeksioni.
Mirëpo, Bashkia e Tiranës vijon të organizojë koncerte e të ftojë njerëzit te Amfiteatrit, që mbrëmjen e sotme është shndërruar në një skenë, ku janë ngjitur këngëtarët e shumtë popullor, për të dhuruar atmosferë, nën ritmet e këngëve të tyre.
Gjithçka u transmetua edhe nga vetë kryebashkiaku Erion Veliaj, i cili ka ftuar qytetarët që të mblidhen tek Amfiteatri, pavarësisht se vendi në këtë kohë po kalon në një periudhë mjaft të nxehtë të pandemisë së Covid-19.
https://www.facebook.com/ErionVeliaj/videos/3600067546699842/
Siç shihet edhe nga pamjet në koncert kanë munguar rregullat e distancimit socia dhe maskat për të cilat ekspertët po bëjnë thirrje të vazhdueshme që të bëhen të detyrueshme me ligj në vende publike.
Për më tepër, Veliaj pak orë para këtij koncerti, priti artistët në zyrën e tij, ku nga pamjet shihen ulur afër njëri-tjetrit, kur minimumi i largësisë supozohet të jetë 1.5 metra, edhe këta pa maska. Zyra e kreut të Bashkisë është një ambient i mbyllur dhe sipas udhëzimeve nga ISHP dhe Ministrisë së Shëndetësisë, një gjë e tillë nuk duhet të ndodhë në mënyrë absolute. Ky është apeli i përditshëm që Ministria e Shëndetësisë iu bën qytetarëve për të ulur numrin e rasteve të reja të infektuar me koronavirus në vendin tonë.
https://www.facebook.com/38316716925/posts/10158657320506926/
Kujtojmë se edhe muajin që shkoi, në qershor, kryebashkiaku Erion Veliaj mblodhi qytetartët tek Amfiteatri, për të njëjtën arsye, duke bërë që qytetarët të harrojnë krejtësisht koronavirusin, dhe të ‘zhyten’ në kërcime e duatrokitje.
Mirëpo, në këtë mënyrë vendoset në rrezik i gjithë shëndeti i qytetarëve dhe sakrifica jonë 2 mujore që kaluam në karantinë. Padyshim që rikthimi i festës dhe jetës në kryeqytet ka vlerë dhe është i rëndësishëm, por jo i domosdoshëm. Sidomos në këtë situatë, kur gjendja duke më alarmante se në fillim të epidemisë dhe shifrat po rriten çdo ditë edhe më shumë.
