Pas 7 muajsh mbyllje të aktivitetit për shkak të koronavirusit, të gjitha kinematë në vend do të rihapen sërish. Urdhri i ministres së Shëndetësisë ka hyrë në fuqi menjëherë në Fletoren Zyrtare, duke i përjashtuar kinematë nga aktivitetet që kufizohen për shkak të masave anti-Covid.
Në urdhër thuhet se kinematë duhet të respektojnë protokollin e miratuar nga Instituti i Shëndetit Publik për parandalimin e përhapjesë së infeksionit Covid-19. Më vonë Ministria e Shëndetësisë do të bëjë publik të gjithë protokollin që duhet ndjekur nga kinematë dhe qytetarët për të mbrojtur veten dhe të tjerët nga virusi.
Nga ana tjetër për teatrot dhe koncertet nuk është marrë ende asnjë vendim për rihapje. Institucionet e artit dhe të kulturës ishin të parët që u mbyllën pas shpërthimit pandemisë në Shqipëri, pasi konsideroheshin si vende me rrezikshmëri të lartë për përhapjen e koronavirusit.
Artistët dhe drejtuesit e kinemave në vend prej kohësh kishin bërë thirrje për rihapjen e tyre, duke qenë se thuajse çdo aktivitet nisi sërish punën pas përfundimit të izolimit total. Ky vendim i Ministrisë së Shëndetësisë vjen një ditë para se të hyjë në fuqi urdhëri për mbajtjen e maskës me detyrim në ambiente të mbyllura e të hapura, ose në të kundërt qytetarët duhet të paguajnë një gjobë prej 3000 lekësh të reja apo 5000 lekësh të reja në rast përsëritjeje.
